FUAD ƏLİYEV DSK-dan MSK-ya şikayət edib

2020-ci il fevralın 9-da Milli Məclisə keçiriləcək seçkilərdə 26 saylı Sabunçu birinci seçki dairəsindən deputatlığa namizəd Azərbaycan Liberal Demokrat Partiyasının (ALDP) sədri Fuad Əliyev Mərkəzi Seçki Komissiyasının sədri Məzahir Pənahova şikayət ərizəsi ilə müraciət edib.

Versus.Az-ın məlumatına görə, ərizədə deyilir:

Hörmətli Məzahir müəllim!

Təbliğat, təşviqat kampaniyası çərçivəsində namizədlər üçün müəyyən edilən yerlərdə vurulan təbliğat posterlərim cırılır, yarasız hala salınır. Bununla bağlı səlahiyyətli nümayəndəmin adıçəkilən dairə seçki komissiyasının katibi Roza Məmmədovaya etdiyi müraciətlər nəticəsiz qalıb.

Hər gün bu hadisə ilə üzləşdiyimizdən bu dəfə DSK sədri Hüseynqulu Əliəsgərova müraciət etdik. Seçki dairəsi ərazisində namizədlərin təbliğatı üçün nəzərdə tutulan 74, 252, 94, 213 saylı məktəblərin həyətində asılan lövhələrdən posterlərimizin cırılması ilə bağlı edilən şikayətlərimizə baxmayaraq bu prosesin hər gün baş verdiyini və məsələ ilə bağlı MSK-ya müraciət edəcəyimizi onun nəzərinə çatdırdıq. DSK sədrindən "Problem deyil, şikayət edin" cavabını aldıq.

Hörmətli Məzahir müəllim!

Hər gün belə hadisələrin baş verməsi ALDP namizədinə olan basqılardan, təbliğatımızın aparılmasına yaradılan süni əngəllərdən xəbər verir. Belə neqativ halların və ALDP-nin namizədinə qarşı aparılan çirkin kampaniyanın qarşısının alınmasını sizdən xahiş edirik".

Versus.Az