"Nə təhsilə, nə də səhiyyəyə dövlətin ayırdığı vəsait yetərli deyil"

“Azərbaycan təhsilinin vəziyyəti olduqca ağırdır. Təsəvvür edin ki, Avropada ilboyu bir şagirdin təhsilinə maksimum 4 min avro, minimum isə 1200 avro vəsait ayrılır. Bu, sadəcə bir nəfərin təhsil xərcidir. Bura texniki vəsaitlər, repititor və müəllimlərin maaşı və s. daxildir. Azərbaycanda isə bir şagridin və ya tələbənin illik xərci 172 manatdır. Fərq bu qədər böyükdür".

Versus.Az Moderator.az-a istinadən xəbər verir ki, bu sözləri açıqlamasında Ümid Partiyasının sədri İqbal Ağazadə deyib.

Partiya sədri bildirib ki, dünyanın inkişaf etmək istəyən ölkələrinin hamısı ilk növbədə insana investisiya qoyur. İnsana investisiya qoymaq isə təbii ki, yeni nəslin düşçüncə və təfəkkürünün dəyişdirilməsi, yeni texnologiyalara uyğumlaşdırılması, elmi, təhsili əxz etməsi ilə ölçülür:

"Başqa heç bir şeylə ölçülmür. Bunun yanında, həm də sağlam insan yetişdirmək faktoru kimi onun sağlamlığına da diqqət yetirilir. Səhiyyə baxımından da Azərbaycan digər ölkələrdən ayrılan vəsaitin miqdarına görə 10-15 dəfə geri qalır. Deməli, nə təhsilə, nə də səhiyyəyə dövlətin ayırdığı vəsait yetərli deyil. Hesab edirəm ki, təhsilə ayrılan vəsaitin daha da artırılmasına ehtiyac var”.