Fuad Əliyev: “İnanıram ki, Qarabağ problemi bizi birləşdirib böyük Qələbəyə aparacaq”

“1988-ci il noyabrın 17-də meydana toplaşan yüz minlərlə insan həqiqi mənada qəhramanlıq nümayiş etdirdilər. Həmin dövrdə, Sovet imperiyasının hələ də güclü olduğu bir vaxtda küçələrə çıxıb öz etirazını bildirmək hər xalqın hünəri deyildi”.

Bunu Versus.Az-a ALDP sədri Fuad Əliyev bildirib.

17 noyabrın – dirçəliş gününün Azərbaycana verdiyi töhfələri təhlil edən ALDP sədri bu mübarizliyin İsmixan Rəhimov, Şıxali Qurbanov, Xudu Məmmədov, Oqtay Eldəgiz kimi ziyalılar tərəfindən xalqa ötürüldüyünü bildirib. Onun sözlərinə görə, o zaman sovet imperiyası meydan hərəkatını dağıtmağa çalışsa da, xalqın Azadlıq uğrunda mübarizəsini, inamını sındıra bilməyib.

“Çox təəssüflər olsun ki, illər keçdikcə xalqımız bu mübarizliyini itirdi. Qarabağ münaqişəsi həll olunmayıb, maaşların və təqaüdlərin az olması, qiymətlərin gündən-günə qalxması, rüşvət və korrupsiya hallarının artdığı bir dönəmdə xalqın etiraz hissi yaranmır. Gələcəyə inamsızlıq hardasa müxalifət partiyaları arasında daxili intriqalara gətirib çıxarıb. Ən məsələ isə budur ki, bu vəziyyəti bugünki iqtidarın təzyiqləri yaradır. Amma inanıram ki, Qarabağ problemi bizi birləşdirib böyük Qələbəyə aparacaq”.

F.Əliyev bu gün Qarabağın işğaldan azad olunmasından danışan Qarabağ Komitəsinin ikinci meydan hərakatını yaratmasını mümkün saymadığını vurğulayıb:

“Qarabağ Komitəsi arzu etdiyimiz kimi ikinci bir meydan hərakatını yarada bilməyəcək. Çünki Qarabağ Komitəsi hələ ki, bütün cəmiyyəti birləşdirə bilməyib. Ən azından ona görə ki, yüz minlərlə qaçqınımız və məcburu köçkunlər Komitəyə dəstək vermir. Üstəlik, muxalifətdaxili intriqalar, bir-birilərini qəbul etməmək ümummilli mübarizəmizin qarşısında dayanan ən böyük maneədir”.

LƏMAN
Versus.Az