Marsda enerji əldə etməyin ən yaxşı yolu

Günəş enerjisi Marsın kəşfiyyatı üçün nüvə enerjisindən daha uyğundur.

Bu barədə “Frontiers in Astronomy and Space Sciences” jurnalında məqalə dərc olunub.

Alimlər iki növ pilotlu missiyanı bütövlükdə təhlil edərək müqayisə ediblər. Modellərdən birində planetin səthində əsas elektrik mənbəyi kimi portativ nüvə reaktoru, digərində isə Günəş panelləri xidmət edib.

Tədqiqat zamanı hər iki halda altı nəfər üçün tələb olunan enerji avadanlığının ümumi kütləsi nəzərə alınıb.

Məlum olub ki, ekvatorda yerləşdirildikdə ən səmərəli sistem sıxılmış hidrogendən istifadə edərək enerji saxlayan fotoelementlərdir. Avadanlıqlar gün ərzində suyu oksigen və hidrogenə ayıracaq, gecə isə yanacaq elementlərində onlardan elektrik enerjisi alacaq. Bunun üçün 8,3 ton avadanlıq tələb olunacaq, nüvə enerjisindən istifadə zamanı isə bu göstərici 9,5 tondur.

Yuxarı en dairələrində nüvə enerjisi Günəş enerjisindən üstün olmağa başlayır, lakin Marsın səthinin yarısında fotoelementlərə üstünlük verilir.

Berkli Kaliforniya Universitetinin alimləri tədqiqat zamanı modeldə bir çox amilləri, o cümlədən Günəşin parlaqlığını, həm atmosferin, həm tozun sıxlığını, günün bütün vaxtlarında havanın və səthin temperaturunu nəzərə alıblar.