Kitabələri dinləndirən qadın

AMEA Milli Azərbaycan Tarixi Muzeyində yerli Qadınlar Şurasının təşəbbüsü ilə görkəmli alim, ilk qadın-epiqraf Məşədixanım Nemətovanın 95 illiyinə həsr etdiyi “Əsrin daş yaddaşında mənim də sözüm qaldı” adlı anım tədbiri keçirildi.

Versus.Az-ın məlumatına görə, tədbiri Muzeyin direktoru akademik Nailə Vəlixanlı açdı. O, görkəmli alim, ilk qadın-epiqraf olan M.Nemətova haqqında danışaraq, onun elmə vurğunluğunu, elm fədaisi olduğunu qeyd etdi.

Tədbirə təşrif buyurmuş AMEA İctimai bölmənin akademik-katibi akademik Nərgiz Axundova, Arxeologiya və Etnoqrafiya İnstitutunun direktoru, t.ü.e.d. Maisə Bağırova, Muzeyin Numizmatika və Epiqrafika şöbəsinin müdiri, professor Əli Rəcəbli, professor Şahin Fərzəlibəyov, Bayraq Muzeyinin direktoru t.ü.f.d. Könül İmamverdiyeva AMEA müxbir üzvü Məşədixanım Nemətovanın elmi yaradıcılığından, Azərbaycanı qarış-qarış gəzib daş kitabələri araşdırıb mənasını bizə çatdırmasından bəhs etdilər.

İlk qadın-epiqraf olaraq, Məşədixanım Nemətova gecəni gündüzə qatıb, yorulmadan daşların üzərində yazılan tariximizi, torpaqlarımızın bütövlüyü uğrunda mənfur qonşu ölkənin alimləri ilə mərdanə vuruşan alimlərdəndir.

Tədbirdə professor Şahin Fərzəlibəyov bu qadının mərdliyinə, zəkasına həsr etdiyi bir şeyirini də oxudu.

Tədbirin sonunda M. Nemətovanın qızı, t.ü.e.d. Vəfa Quliyeva anası ilə bağlı ailə xatirələrindən danışaraq, tədbiri təşkil edənlərə və Muzeyin müdiriyyətinə öz minnətdarlığını bildirdi.

Ayəndə Dadaşova
Versus.Az