Deputatın parlamentdə bir günü

10:22 28-10-2022 | 401 | Cəmiyyət

"Partiya işi bu deyil, amma başqa yolumuz da yoxdur"

Milli Cəbhə Partiyasının (MCP) sədri, deputat Razi Nurullayev parlamentdəki bir gününü şəxsi "facebook" hesabında təsvir edib.

Versus.Az axşam saatlarında iş otağından foto paylaşan millət vəkili, hələ də parlamentdəki kabinetində olduğunu bildirib:

"Xeyli məktubla məşğul oldum, xeyli araşdırılmağa ehtiyacı olan məktubları oxuyub kənara yığdım, 5 dövlət qurumu ilə telefonla danışıb seçici məsələlərini müzakirə etdim, ən azı 6 məsələ həllini tapdı və bir neçəsi də gözlənilir. Sonuncu görüşüm isə saat 23.00-ə təyin olunub. Bu günkü günümüz belə".

MCP sədri bildirib ki, partiya üzvləri onu görə bilmədikləri üçün şikayətçidirlər:

"Rəhbəri olduğum Milli Cəbhə Partiyasının rəhbər heyətindən tutmuş sıravi üzvlərinə qədər narazılıq edirlər ki, sizi görə bilmirik. Partiya rəhbərliyinə daxil olan şəxslər də sosial şəbəkələrdən mənə ünvanlanan məktublarla tanış olur və əlaqə saxlayırlar. Hüquq şöbəsi şikayətçiləri partiya ofisində qəbul edir və hər cür köməklik göstərir, şikayət məktubu yazır, məhkəməyə gedir, idarələrlə əlaqə saxlayır. Yəni bütün partiya ölkədə olan narazı şəxslərin sayını azaltmaqla məşğuldur. Hərçənd ki, partiya işi bu deyil. Amma başqa yolumuz da yoxdur. Ölkəyə xidmət etməliyik və edirik".

Versus.Az