Müğənni Emin Ağalarov ABŞ-dakı qastrolları başqa tarixlərə keçirə bilməsə, öz amerikalı pərəstişkarlarının biletlərə xərclədikləri pulları geri qaytaracağını söyləyib.

Versus.Az xəbər verir ki, o, ABŞ tərəfinin ona qarşı irəli sürdüyü ittihamların “fantastika aləmi”ndən olduğunu bildirib.

Daha əvvəl musiqiçinin vəkili Skott Balber NBC telekanalına bildirib ki, ABŞ-ın “Rusiya işi” üzrə xüsusi prokuroru Robert Müller rusiyalı müğənni E.Ağalarovun sorğu edilməsi üçün müraciət göndərib. Dünən E.Ağalarov “Twitter” hesabından ABŞ və Kanadaya qastrol səfərlərini ondan asılı olmayan səbəblərə görə təxirə saldığını bildirib.

“Mən heç bir qanunu pozmamışam, gizlədəcəyim heç nə yoxdur. Əgər nəticədə məni hardasa tutub kameraya oturdacaqlarsa və uzun illər ifadə verəcəyəmsə, nə etmək olar? Taleyin hökmü belə olacaq. Əlbəttə ki, istəməzdim elə olsun, ancaq yenə də mən heç bir sərhədi, qanunu pozmamışam. Prinsipcə, bu gülməlidir. Müzakirə olunan və irəli sürülənlərin hamısı “fantastika aləmi”ndəndir”, - deyə E.Ağalarov “Rossiya 24” telekanalının efirində deyib.

Daha əvvəl ABŞ mətbuatı yazmışdı ki, ABŞ prezidentinin oğlu kiçik Donald-Tramp 2016-cı ilin iyununda “Crocus Group” şirkətinin rəhbəri Araz Ağalarovun oğlu E.Ağalarovun vasitəsi ilə guya Kremldə əlaqələri olan rusiyalı vəkil Natalya Veselnitskaya ilə görüşüb və ona Hillari Klintona qarşı kompromat hazırlamağı tapşırıb. Sonradan kiçik Tramp bildirib ki, N.Veselnitskayada heç bir önəmli məlumat olmayıb.

Versus.Az