“Bu il sülh müqaviləsinin imzalanmasını gözləmirəm”.

Versus.az xəbər verir ki, bunu jurnalistlərlə söhbətində prezidentliyə eks-namizəd, siyasi şərhçi Fuad Əliyev sülh müqaviləsinin ilin sonuna qədər bağlanıb bağlanmayacağı ilə bağlı sualı cavablandırarkən söyləyib.

Onun sözlərinə görə, hər iki tərəfin rəsmiləri mətbuata verdikləri bəyanatlarda sülh müqaviləsinin hazır olmadığını bildirirlər:

“Ermənistan parlamentinin spikeri Alen Simonyanın yaxın 15 gün ərzində sülh müqaviləsinin imzalanmasının mümkün olduğunu deyib. Rəsmi Bakının sülh müqaviləsi ilə bağlı təkliflərində hələ də razılaşdırılmamış bir sıra məsələlər açıq qalıb. Ermənistan delimitasiya ilə bağlı olan işçi qrupunun görüşünü təklif edib. Əvvəlki görüşlərdə bəzi məsələlər razılaşdırılıb. Buna baxmayaraq, bu məsələdə konkret bir irəliləyiş yoxdur”.

Fuad Əliyev bildirdi ki, Azərbaycanda artıq növbədənkənar prezident seçkilərinə start verilib. Onun sözlərinə görə, bütün diqqət seçkilərdə olduğu üçün bu il sülh müqaviləsinin imzalanması inandırıcı deyil.