İsveçrədə də Novruz bayramı qeyd edilib

İsveçrənin paytaxtı Bern şəhərində Azərbaycanlıların İsveçrədəki Koordinasiya Şurası tərəfindən Novruz bayramına həsr olunmuş tədbir keçirilib.

Azərbaycanın İsveçrədəki Səfirliyindən Versus.Az-a verilən məlumata görə, açılış mərasimində koordinasiya şurasının əlaqələndiricisi Qasım Nəsirov, o cümlədən bu ölkədəki diaspora təşkilatlarımızın rəhbərləri Arzu Əliyeva və Cevzet Aras çıxış edərək Azərbaycanın qədim mədəniyyət tarixində özünəməxsus yer tutmuş Novruz bayramı, onun adət və ənənələri, tarixi və xüsusiyyətləri barədə ətraflı məlumat verib, həmçinin Novruz bayramının məhz Azərbaycanın təşəbbüsü ilə YUNESKO-nun qeyri-maddi mədəni irs siyahısına salındığı bildirilib.

Tədbir çərçivəsində həmçinin İsveçrədə fəaliyyət göstərən “Qarabağ” Azərbaycan məktəbinin şagirdləri tərəfindən rəqs nümunləri qonaqlara təqdim olunub və Novruza həsr olunmuş şeirlər səsləndirilib.

Şənlik iştirakçılarına musiqi proqramı ilə yanaşı milli mətbəximizin ləziz nümunələri, o cümlədən şirniyyatlardan ibarət ziyafət verilib.

Tədbir Azərbaycanın bu ölkədəki səfirliyi və Diasporla İş üzrə Dövlət Komitəsinin dəstəyi ilə baş tutub. Gecədə dispora üzvləri ilə yanaşı İsveçrə ictimaiyyətinin nümayəndələri də iştirak ediblər.