Millət vəkili Qənirə Paşayeva Ərzurumun düşmən işğalından qurtuluşunun və Azərbaycan Xalq Cümhuriyyətinin qurulmasının 100-cü ildönümü münasibətilə Ərzurumda Azərbaycan Bulvarı, Heydər Əliyev parkında “100-cü İl Qəhrəmanlar abidəsi”nin açılışında iştirak edib.
Versus.az-ın mlumatına görə, səfər çərçivəsində Q. Paşayeva Ərzurum Böyükşəhər bələdiyyə başqanı Mehmet Sekmen ilə görüşüb. Millət vəkilinin Ərzurumda Qarabağ parkı və abidəsi açılması təklifini bələdiyyə başqanı dəstəkləyib və yaxın zamanlarda reallaşacaq deyib.
Qənirə Paşayeva görüş zamanı Ərzurumda təhsil alan azərbaycanlı tələbələr barədə də bələdiyyə başqanına məlumat verərək onların ortaya çıxan qayğı və problemlərinin həlli istiqamətində dəstək göstərilməsini xahiş edib. Söhbət zamanı Ermənistanın işğalçılıq siyasəti barədə geniş məlumatlar verilib.
Ərzurumun düşmən işğalından qurtuluşunun və Azərbaycan Xalq Cümhuriyyətinin qurulmasının 100-cü ildönümü münasibətilə Ərzurumda keçirilən gecədə bütün Müsəlman dünyasında ilk Cümhuriyyətin Azərbaycanda qurulmasından, müsəlman şərqində ilk dövlət olmasından danışan millət vəkili, siyasi elmlər doktoru Q.Paşayeva bu bizim qürur tariximizdir deyib.
Tədbirdə Azərbaycanın Əməkdar Artisti Lalə Məmmədova geniş konsert proqramı ilə çıxış edib və vətənpərvərlik mahnılarını səsləndirib.