Seçkiöncəsi məcburi köçkünləri incitməkdə kimlər maraqlıdır?

20:11 15-03-2018 | icon 1019 | Sosial
Seçkiöncəsi məcburi köçkünləri incitməkdə kimlər maraqlıdır?

Bəzi məmurlar yenə də vəzifələrindən sui-istifadə edirlər

Bakı şəhəri Nizami rayonu, Babək prospekti 87 ünvanında yerləşən 1 saylı yataqxanada məskunlaşmış 27 məcburi köçkün və təxminən 10 yerli ailə bu yağışlı, küləkli qış günlərini çöldə keçirmək, Novruz bayramını küçədə-bayırda qarşılamaq təhlükəsi ilə üzləşib.

Versus.az bu haqda 1995-ci ildən həmin binada məskunlaşmış, Laçın rayonundan məcburi köçkün İbrahim Mirzəyevin Moderator.az-a verdiyi məlumatı təqdim edir.

Məcburi köçkünün sözlərinə görə, əvvəllər Dövlət Neft Şirkətinin bazasında olan bu yataqxana hazırda Nizami rayon 121 saylı MİS-in balansına verilib. Binada cəmi 112 ailə yaşayır, onlardan 54-ü məcburi köçkündür:

“Təxminən 15 gün öncə Qaçqınlarla İş üzrə Dövlət Komitəsinin nümayəndələri otaqlarda yaşayan köçkünləri yoxlayıb təzədən siyahıya aldılar. Daha sonra Nizami rayon İcra Hakimiyyəti iki gün ardıcıl olaraq yenə siyahıyaalma təşkil etdi. Eyni zamanda 121 saylı MİS əməkdaşları... Məsələ belə qoyulub ki, ailə üzvlərinin sayından asılı olaraq hər ailəyə 30-40 min manat kompensasiya ödənilməlidir. Ancaq 54 köçkün ailədən 28-nə xəbərdarlıq edildi ki, sizdə müəyyən problemlər olduğu üçün sizə evpulu verilməyəcək, binanı tərk etməlisiz. Deyirlər ki, siz çıxın, köçkünlər üçün yeni binalar tikiləndə nəzərə alarıq.
Həmin 28 ailə hazırda binanın qarşısında toplaşaraq bu haqsızlığa etiraz edirlər. Binadan çıxan ailələrin evlərini sökməyə başlayıblar. Hələ də binada yaşayanlar olduğu halda bu yağışlı, küləkli, soyuq gündə bütün kommunal xətləri kəsirlər. Vəziyyət çox acınacalıdır”.

İbrahim Mirzəyev bildirib ki, hazırda Nizami rayon İcra Hakimiyyəti başçısının müavini də ərazidədir və insanların mənzillərindən çıxarılmasına nəzarət edir və Füzuli rayon icra başçısının da gəlişi gözlənilir.

Məcburi köçkün vurğulayıb ki, 28 köçkün ailədən 3-ü Laçın, 25-i isə Füzuli rayonundandır:

“Ancaq “Qaçqınkom”dan heç kəs gəlməyib. Deyirlər ki, məsələnin bizə aidiyyatı yoxdur. Dünən həmin 28 ailənin nümayəndələri Prezident Administrasiyasına gedib, oradan Nazirlər Kabinetinə getməyi məsləhət görüblər. Nazirlər Kabinetində isə deyiblər ki, ərizə yazın, biz yuxarılara çatdırararıq. Vəssəlam... Ancaq hələlik konret tədbir görən yoxdur. Erməni zülmlərindən zor-güc qurtulmuş, qan-qada görmüş doğma ocaqlarını itirmiş bu 28 ailə indi də məmur özbaşınalığı ucbatından taleyin ümidinə buraxılıb”.

Həmin 28 ailənin sənədlərində hansı problemin olmasına, hansı əsasla onlara kompensasiya verilmədiyinə gəlincə, İbrahim Mirzəyev bildirib ki, əsaslı arqument göstərməyiblər:

“Məntiqsiz məsələlər qoyurlar ortalığa. Məsələn, kimsinsə qapısını döyüblər, işdə olub, kimsə yasa gedib. Onları qeydiyyata almayıblar. Ya da gəlib girirlər otağa soruşurlar ki, sənin burada qeydiyyatda olan övladın hardadır. Ev sahibi cavab verir ki, dərsdədir. Rəsmi nümayəndə isə təkrar sual edir ki, sənin uşağın niyə dərsdədir, deməli, sən burda yaşamırsan. Yaxud başqa bir otağa girib baxırlar ki, qoca bir arvad qalır orada. Deyirlər ki, sən qoca arvadsan, otağı belə bəzəyə bilməzsən, sən burda yaşamırsan. Digər birinə girib 20 ildən çoxdur orada yaşayan insana deyirlər ki, yox, bizim əlimizdə siyahı var, sən burda yaşamırsan. Konkret bir hüquqi səbəb göstərilmir ki, məsələn, ay filankəs, sənin Bakının filan ünvanında mənzilin var, odur ki, burada yaşamağına görə sənə kompensasiya verilməyəcək. Bəzi köçkünlərə həmin binada yaşaya-yaşaya 16 manat kommunal xərclər üçün pul verildiyinə görə indi deyirlər ki, yox, sən həmin pulu aldığına görə, deməli, burada yaşamırsan, başqa yerdə evin var. Axı, o hökumətin məmurlarının günahıdır ki, yataqxanada yaşayan köçkünə kommunal xərc üçün pul yazıblar. İndi məmurların günahını nədən hansısa yaşlı, savadsız, qanunları, hüquqlarını bilməyən qaçqın ödəməldir?”

İ.Mirzəyevin sözlərinə görə, dövlət məmurları vətəndaşlarla çox kobud, saymazyana rəftar edir. Onların yaşadıqları otaqlara ayaqqabıyla girir, icazəsiz olaraq qaçqınların yataqlarına əl atır, yorğan-döşəklərini sayır, soyuducularını yoxlayırlar:

“Ev sahibi onlardan soruşanda ki, siz kimsiniz, sizə kim ixtiyar verib, yaşadığım otağa ayaqqabıyla girirsiz, mənim yatağıma əl uzadırsız, soyuducumu yoxlayırsız, məmurlar cavab verir ki, siz “qara siyahı” düşdünüz, indi bilərsiniz biz kimik.
Eyni zamanda 10-na yaxın yerli sakin də binadan çıxmaq istəmir. Çünki ödəniləcək kompensasiya onları qane etmir. Məsələn, biri deyir ki, mən tək adamam, mənə 30 min manat verəcəklər, o qiymətə haradan ev alım”.

Köçkünlər KİV-dən səslərini dövlət başçısına, 1-ci Vitse-prezidentə çatdırmağı tələb edirlər. Onlar deyir ki, biz aprelin 11-dəki Prezident seçkilərinə açıq ürəklə getmək istəyirik.

Xatırladaq ki, FHN 2014-cü ildən bəri tərəfindən qəzalı elan edilmiş Bakı şəhəri, Nizami rayonu, Babək prospekti 87 ünvanında yerləşən sözügedən bina sakinlərinə tərk etmək üçün 3 gün müddətinə vaxt verib.

P.S. Məsələ ilə bağlı əlaqədar qurumların münasibətini dərc etməyə hazırıq.

P.P.S. Ümumiyyətlə, torpağı işğal altında olan, dünyanın supergüclərinin təhdidlərinə məruz qalan, Azərbaycanda bəzi məmurların öncədən ölçüb-biçmədən vətəndaşların, özü də müharibənin ağrı-acılarını çiynində daşıyan məcburi köçkünlərin narazılığına səbəb olacaq işlər icra etməsi Prezident seçkiləri ərəfəsində heç də xoşagələn hal deyil.

Sultan Laçın

Xəbər lenti

InvestAZ

Ən çox oxunan xəbərlər

Əfəndilər, Yardımlı da Azərbaycandır

Röyanın Moskva konserti təxirə salındı - SƏBƏB?

Moskvadakı dəhşətli terrorda ölənlərin sayı 150-yə çatıb

Rusiyada teraktda yaralananların durumu açıqlanıb

Ayılar üçün maraqlı əyləncə

Artritə səbəb olan 5 mühüm SƏHV

İdmançımız Almaniyada keçirilən turnirdə ikinci qızıl medalını qazanıb

Tarixçidən maraqlı faktlar

Gündə 1 dəqiqə cəfəri çeynəyin

Şəfalı olduğu düşünülən bu bitkilər böyrəkləri çürüdür

Gimnastlarımız Dünya Kubokunda finala yüksəliblər

İtlər hətta simvolları da anlayırlar

Dəri problemlərindən mərciməklə xilas olun

Bu iki ədviyyatı birgə istifadə edin

Almaniya səfərdə Fransanı məğlub etdi