Məktəbin komandasına kubok, futbolçulara isə qızıl medallar təqdim olunub

İyunun 19-da Masallı Olimpiya İdman Kompleksinin örtülü zalında yüzlərlə tamaşaçı olduqca maraqlı oyun izləyib.

Versus.Az cenubxeberleri.com-a istinadən xəbər verir ki, AFFA-nın təşkil etdiyi məktəblilərin “Coca–Cola” mini futbol turnirində şəhər 4 saylı Digah tam orta məktəbin 14-15 yaşlı şagirdlərindən ibarət komandası ölkənin 2 mindən artıq məktəb komandası sırasında bütün rəqiblərinə qalib gələrək Respublika finalına vəsiqə qazanıb.

Finala qədər Digah 4 saylının komandası çox uğurlu yol keçib.

Öncə Masallıdakı bütün rəqibləri məğlub ediblər.

2-ci mərhələdə Lənkəran, Astara, Cəlilabad, Lerik, Yardımlı komandaları masallılarla görüşlərdə ağır məğlubiyyətə uğrayıblar.

3-cü mərhələdə Muğan zonasını təmsil edən Sabirabad və Kürdəmir məktəbliləri masallılarla məğlubiyyətdən qurtara bilməyib. Nəhayət, Bakıda Beyləqan 4/1 finalda masallılara məğlub olub.

Yarımfinalda isə Bakının Xəzər rayonunun məktəbli futbolçuları da masallılar qarşısında “ağ bayraq” qaldırıb.

Sonda, finalda – Masallı Olimpiya kompleksində Ağdam və Masallının 14-15 yaşlı futbolçuları mini futbol yarışmasında üz-üzə gəliblər. Masallılar oyunun ilk dəqiqəsinə qolla başladığı kimi, son dəqiqələri də qolla bitiriblər.

Ümumilikdə isə ağdamlıların qapısına 1-ci hissədə 3, 2-ci hissədə 2 cavabsız top vurmaqla 5:0-lıq qələbəyə nail olublar.

Qol vuran futbolçular aşağıdakılardır:

• İsmayıl (qapıçı, penalti) ilk dəqiqələrdə
• Rəfael həsənov
• Mehti Cavadov
• Tağı Nağıyev
• Elman Şirinov 

Komandanın üzvlərindən Xədicə Bəşirova və Sadiq Bəşirov bacı-qardaşlarının oyunu maraqlı təsir bağışlayıb. Komandanın məşqçiləri - Qabil və Emil Mahmudovlardır.

AFFA-dan bu yarışı qurumun məsul işçisi Elxan Məmmədov və Neftçi-nin keçmiş futbolçusu Asif Əliyev, eləcədə yarışın təşkilatçısı Coco-Colanın rəsmiləri izləyib.

Masallının qalib komandasına – 4 saylı Digah məktəbinin komandasına kubok, futbolçulara isə qızıl medallar təqdim olunub.

Qeyd edək ki, ötən il də bu yarışmanın qalibi masallılar - Ərkivan 4 saylı məktəbin futbolçuları olub.

Versus.Az