“JARA”nın ikinci günü belə keçdi

Bakıda, Xəzər dənizinin sahilində yerləşən Sea Breeze Resort istirahət məkanında “JARA” Beynəlxalq festivalı davam edir.

Versus.Az-ın məlumatına görə, fesivalın ikinci günü yenə də təşkilatçı heyət və ulduz müğənnilərin qırmızı xalı üzərində paradı baş tutdu. Bunlar Diana Arbenina, İlqar Xəyal, Serqey Kojevnikov və həyat yoldaşı, Artik&Asti, Denis Klyaver və həyat yoldaşı, Nigar Camal, Filipp Kirkorov və Aygün Kazımova, Emin və həyat yoldaşı Alyona, Sergey Jukov və həyat yoldaşı, Qriqoriy Leps və qızı Yeva , Stas Mixaylov, “Noviye Samosveti”, Brandon Stone, “FABRİKA” qrupu, Jasmin, Brilliant Dadaşova və oğlu, öz səmimiyyəti ilə seçilən Leyla Əliyeva, oğlu Mikayıl və onun dostları idi.

Bu dəfə də xalının üzərindən keçənləri Yana Koşkina və Konstantin Tarasyuk qarşılayıb onlara maraqlı sualları ilə müraciət edirdilər. Ulduz qonaqlar festivalda iştirak etməkdən çox məmnun olduqlarını, Bakıya və milli xörəklərimizə heyran olduqlarından bəhs edirdilər. Amma aparıcıların bir sualı onları bir az təşvişə salırdı – çünki festivalın ikinci günü iki məşhur müğənni Qriqoriy Leps və Stas Mixaylovun batlı ilə başlanacaqdı.

Sual isə belə idi – onlardan hansını daha çox bəyənirsən, hansı daha çox güclüdür? Hamı fikirləşmədən deyirdi ki, belə bir anda yalnız dostluq qələbə çalmalıdır. Yalnız Brandon Stone Qriqoriy Lepsi qalib görərək, öz fikrini söylədi.

Qırmızı xalıya çıxanların arasında ən çox diqqət çəkən cütlük Filipp Kirkorov və Aygün Kazımova oldu. Onlar həmin gün “CALMA” mahnısını bərabər ifa edəcəkdilər. Bu duetin hazırlanması haqqında ulduzların hər ikisi örtülü olsa da, jurnalistlərə qısaca məlumat vermişdilər. Çünki hələ 2006-cı ildə Aygün Kazımova Kreml Sarayında solo konsert verərkən bu mahnını Filipp kirkorovla ifa etmişdir. Və müğənnilər hər zaman vurğulayırlar ki, onların dostluğu illərdir ki davam edir. Tamaşaçılar, festivalda səslənən bu mahnının yeni versiyasını dinlədi.

Qırmızı xalı paradı bitdikdən sonra konsert məhz iki məşhurun batllı ilə başladı. Konsertdə Slava, Jasmin, Sergey Jukov, Tamara Qvartsideli, Diana Arbelina Stas Mixaylovla duet, Stiven Siqal (Qriqoriy Leps ilə duet), İqor Nikolayev, Denis Klyaver, Brilliant Dadaşova, Valeriya, Leonid Aqutin. atası Nikolay Aqutin və başqaları çıxış etdi.

Sonda kollektivin 30 yaşını qeyd edən məşhur “LYUBE” qrupu əvəzolunmaz solist Nikolay Rastorquyevin iştirak ilə çıxış etdi. Bu qrupla da bərabər səhnədə “FABRİKA”, “QOROD 312” qrupları və Viktoriya Dayneko yer aldı.

Ayəndə Dadaşova
Versus.Az