Davud Rəhimov: “İnanıram ki, autizmlə bağlı mərkəz yaradılacaq”

“İnanıram ki, autizmlə bağlı mərkəz yaradılacaq. Çünki bu cür spesifik qruplar üçün artıq dövlət tərəfindən müəyyən mərkəzlər tikilib. Bu proses gedir və cəmiyyətin özü də problemin həlli istiqamətində addımlar atmalıdır”.

Bunu Versus.az-a Əlil İttifaqı Mərkəzinin prezidenti Davud Rəhimov Autuzmlə bağlı gündəmdə olan problemlərin həlli ilə bağlı açıqlamasında bildirib.

Davud Rəhimov autizm sindromu daşıyıcılarının əlillik katiqoriyasına aid edildiyini bildirib. O, bu sahədə müəyyən problemlər olsa da, getdikcə həlli yollarının tapılacağına ümüd etdiyini deyib. D.Rəhimov Əlil İttifaqı Mərkəzində təmsil olunan “Autizm Defektoloji və Psixoloji Yardım Mərkəzi” İctimai Birliyinin rəhbəri Çiçək Məmmədlinin bu sahənin mütəxəsisi olaraq xüsusilə çalışdığını önə çəkib:

“Onun ailəsində üç autist sindromlu uşaq var. O, çox  çətin vəziyyətdədir. Məhz Çiçək xanımın təkidi ilə autist sindromlu uşaqlara əlillik qrupu verilib. Məsələ Milli Məclisdə müzakirə olunub. Amma əlilliyin hansı formada qeydə alınıb, həmin insanlara əlillik təqaüdlərinin verilməsi ilə bağlı məsələ açıq qalır”.

Autizmlə bağlı vəziyyət gərgin olsa da, D.Rəhimov Autizim mərkəzinin yaradılacağına və bu sahədə mövcud olan pərakəndəliyin aradan qaldırılacağına inandığını vurğulayıb.

ARZU
Versus.Az