“Azərbaycanın təhsil sisteminə hər gələn onu daha da bərbad günə salır”

10:58 25-10-2018 | icon 195 | Təhsil
“Azərbaycanın təhsil sisteminə hər gələn onu daha da bərbad günə salır”

 

Razi Nurullayev: “Problem dərsliklərdə deyil, ümumiyyətlə bizdə təhsil sistemi bərbad gündədir”

 

 

“Orta məktəb dərslikləri elə bərbad gündədir ki, müəllimlərin özləri belə, o vəsaitlərdən istifadə edə bilmirlər”.

 

Bunu Versus.Az-a AXCP sədri Razi Nurullayev dərsliklərin orta məktəb səviyysinə uyğun olaraq hazırlanmaması, ciddi nöqsanların olması ilə bağlı ictimai narahatlıq doğuran məsələlərə münasibətində bildirib. Onun sözlərinə görə, orta məktəblərdə tədris proqramına uyğun olaraq dərs vəsaitlərinin olmaması sonda şagirdlərin TEST imtahanlarında problemlərlə üzləşməsinə səbəb olur.

 

R.Nurullayev bildirib ki, bu problem şagird və müəllimlərlə yanaşı bütün valideynləri, bütövlükdə cəmiyyəti narahat edir:

 

“Dərsliklərdəki yanlışlıqları göstərmək üçün bir misal deyim. Bir neçə il öncə mənim övladlarımın müəllimləri məktəbdə paylanılan dərsliklərdən yox, onlara aldırdıqları keyfiyyətli vəsaitlərdən dərs keçirdilər. Çünki məktəbdə paylanılan dərsliklər bərbad gündədir. Yoxlama gələndə isə keyfiyyətsiz dərslikləri partaların üzərinə qoyurdular. Görünən budur ki, Azərbaycan təhsilində nəinki monopoliya yanaşması var, həm də kimlərəsə pul qazanmaq üçün xalqın genofondunu məhv etmək bahasına şərait yaradılır”.

 

 

Təhsili millətin gələcəyinin inkişafında ən mühüm sahə kimi dəyərləndirən Razi Nurullayev, bu istiqamətdə ciddi monitorinqlərə ehtiyac olduğunu deyib:

 

“Nəinki dərsliklər, ümumiyyətlə Azərbaycanda təhsil sistemi bərbad gündədir. Azərbaycanda təhsil sisteminə hər gələn onu daha da bərbad günə salır. Təhsil elə günə salınıb ki, sanki Azərbaycan xalqının genefondunu məhv etməyə yönəldlib. Mən bunu çəkinmədən deyirəm, təhsil sistemində çalışanlar xalqın düşməninə çevrilirlər”.

 

Partiya sədri bu ildən ingilis dilindən dinləmə testinin də imtahana salındığını vurğulayıb. Bildirib ki, şagirdlərə ingilis dilinin yazısı keçirilsə də, onlara dinləmə və dinlədiyini yazmaq vərdişləri yiyələndirilməyib:

 

“Soruşmaq lazımdır, siz onlara dinlətmisinizmi ki, imtahana da salırsız? Sizin hansı məktəbinizdə linqafon otaqları var? Ancaq bir neçə məktəbdə var ki, o da görüntü üçündür. Əminəm ki, o otağın qapıları aylarla açılmır. Təhsilə olan bu cür laqeydlik Azərbaycan xalqına qarşı düşmənçilik deyil bəs nədir?”

 

Razi Nurullayev son vaxtlar rus dilinin orta məktəblərdə tədris edilməsiylə bağlı yaranan fikir ayrılıqlarına da münasibət bildirib. AXCP sədri rus dilinin tədris edilməsini müsbət dəyərləndirir:

 

“Mənim övladlarım da rus dilində təhsil alırlar. Bu o demək deyil ki, Azərbaycan dilini bilməyəcəklər. Onların öz dilləri ilə yanaşı bir neçə dili bilmələrinin nəyi pisdir?

Bir xatırlatma verim: Aprel döyüşləri zamanı ermənilər sosial mediada ölkəmiz, əsgərlərimiz haqqında xoşagəlməz fikirlər yazıb paylaşırdılar. Bir erməni model isə “ermənilərə dua edin” deyə müraciət etmişdi. Mənim övladlarım onlarla söz “döyüşü”nə çıxaraq susmalarına nail oldular. Təbii ki, söyüşlə deyil, faktlarla danışaraq. Mən bunu biləndə qürurlandım.

Rus, ingilis dilini bilməsəydilər bunu edə biləcəkdilərmi? Təbbi ki, yox. Deməli məktəblərdə dillər tədris olunmalıdır ki, övladlarımız hansısa rusun, ingilisin, fransızın və digər xalqların qarşısında zəif qalmasınlar”.

 

Partiya sədri hesab edir ki, Azərbaycan dilli məktəblərdə verilən təhsil uşaqların dünyagörüşünü artırsaydı, onlara rusdilli məktəblərdəki kimi bilik verilsəydi, hər kəs övladını elə Azərbaycan dilli məktəblərdə oxudardı:

 

“Amma etiraf etməliyik ki, valideynlər övladlarını rus məktəblərinə ona görə qoyur ki, rus dilli məktəblərdə olan müəllimlərin bilik və dünyagörüşü səviyyəsi daha yüksəkdir, Azərbaycan dilli məktəblərdə isə aşağıdır. Təhsil səviyyəsini qaldırmaq lazımdır. Hesab edirəm ki, nəinki rus dilində, ingilis, fransız, yapon və sair müxtəlif dillərdə də məktəblər yaradılmalıdır. Azərbaycan kiçik dövlətdir, biz dünyaya çıxmalıyıq, diplomatlar yetişdirməliyik. TəkcəAzərbaycan dilini bilməklə dünyaya çıxmaq mümkün deyil. Sərhəddi keçən kimi getdiyin ölkənin dilində danışmalısan. Bu baxımdan rus dilinin də məktəblərdə tədris edilməsində qüsur görmürəm. Qüsur hansısa dilin tədrisi deyil, qüsur dərslikləri bərbad gündə hazırlayan şəxslərdə və bu sahəni nəzarətsiz buraxanlardadır”.

 

A.Zeynallı
Versus.Az

Xəbər lenti

InvestAZ

Ən çox oxunan xəbərlər

Hər Novruz Bayramında kövrəlirəm

Şuşa-Laçın yolu - 2019/VİDEO

Əli İnsanovun yersiz iddiaları

“Cənab prezident, qarşınızda xəcalət çəkirəm” FAKTI

RHİM İB Çanaqqala zəfərinin ildönümü və Novruz bayramı ilə bağlı maraqlı tədbir keçirib

Sabah Bakıda güclü külək əsəcək, rayonlarda isə qar yağacaq

Viza rejimi ilə bağlı saziş imzalandı

Qaraciyərin normal işləmədiyini göstərən 6 ƏLAMƏT

Partiya sədrinin Novruz təəssüfləri: BİZ NİYƏ DİLİMİZƏ HÖRMƏT ETMİRİK?

Əfv sərəncamı və “səbəbkar axtarışı” - SORĞU

"Kamikadze 1"

Sabiq deputatlığa namizəd qubalıları təbrik edib

"WhatsApp"da yeni funksiyalar

“Quran ruha görə nazil olunub”

Bakıda Novruz festivalına start verildi