"Mitinqdə həbs olunanlar azad edilsin!"

Ümid Partiyası mitinqdə həbs olunanların dərhal azadlığa buraxılmalarını tələb edir.

Versus.Az xəbər verir ki, bu barədə Ümid Partiyasının Mətbuat Xidmətinin məlumatında bildirilir:

"Azərbaycan Respublikasının Konstitusiyası və "Sərbəst toplaşmaq azadlığı haqqında" qanunun tələblərini pozan Bakı Şəhəri İcra Hakimiyyəti 19 oktyabr tarixində AXCP və Milli Şuraya onların qanunamüvafiq tələblərinə zidd olaraq, Qaradağ rayonunun Lökbatan qəsəbəsində mitinq keçirmək üçün yer ayırmışdı.

Belə ki qanunun tələblərinə uyğun olaraq, Bakının hər bir rayonunda qapalı və açıq görüşlər üçün yerlər ayrılmalı, siyasi partiyalar və vətəndaşlar həmin yerdən məhdudiyyətsiz istifadə etməlidirlər.

Hüquqları pozulan AXCP və Milli Şura 19 oktyabr tarixdə 28 May metrostansiyası önündə mitinq təyin etmiş, beləliklə də hüquqlarının bərpası üçün hakimiyyət qarşısında tələblər irəli sürmüşlər.

Hakimiyyət və polis orqanları mitinq cəhdinin qarşısını xüsusi zorakılıqla almış, aşırı güc tətbiq edərək çoxsaylı aksiya iştirakçısını saxlamışlar.

O cümlədən, AXCP sədri Əli Kərimli heç bir zəruri hal olmadan xüsusi güc tətbiq edilərək həbs olunub.

Azərbaycan Ümid Partiyası olaraq, bu zorakılığı və həbsləri pisləyir, iqtidarı "Sərbəst toplaşmaq azadlığı haqqında" qanunun tələblərinə əməl etməyə çağırır, həbs olunanların dərhal azadlığa buraxılmalarını tələb edirik".

SEVDA
Versus.Az