ALDP dördüncü qalibi müəyyən etmək üçün partiya üzvləri arasında sorğu keçirəcək

Azərbaycan Liberal Demokrat Partiyasının (ALDP) sədri Fuad Əliyev Sədr Aparatının iclasını keçirib.

Versus.Az-ın məlumatına görə, iclasda ictimai-siyasi vəziyyət, ALDP tərəfindən təsis olunan “Azadlıq fədaisi” mükafatının növbəti qalibinin müəyyən edilməsi və bəzi təşkilati məsələlər müzakirə olunub.

“Azadlıq fədaisi” mükafatının partiya tərəfindən 2016-cı ildə təsis edildiyini qeyd edən ALDP sədri, dördüncü dəfə qalibi müəyyən etmək üçün partiyanın üzvləri arasında sorğuya başlanmasını təklif edib.

“Bir ay ərzində keçiriləcək sorğunun nəticələri dekabrın əvvəlində - Beynəlxalq insan hüquqları günü elan olunacaq və qalib müəyyənləşəcək” – deyə, Fuad Əliyev vurğulayıb.

Xatırladaq ki, insan hüquq və azadlıqlarının qorunması sahəsində, Azərbaycanda azad və ədalətli cəmiyyətin qurulması uğrunda göstərdiyi fədakarlığına görə ictimai-siyasi xadimlərə, hüquq müdafiəçilərinə “Azadlıq fədaisi” mükafatı 06 dekabr 2016-cı ildə təsis edilib.

2016-cı ildə REAL sədri İlqar Məmmədov, 2017-ci ildə eks-spiker Rəsul Quliyev, 2018-ci ildə isə AXCP sədr müavini Gözəl Bayramlı “Azadlıq fədaisi” mükafatına layiq görülüblər.

LƏMAN
Versus.Az