Nəhayət ki, Cəmil Həsənli müxalifətçi kimi deyil...

ƏLİSAHİB HÜSEYNOV

/DADP/

Cəmil Həsənli 2 noyabr mitinqi ərəfəsində bir müxalifətçi kimi deyil, bir alim kimi düşünə bildi...

Bəli, nəhayət ki, radikal müxalifət düşərgəsinin aparıcı qanadı sayılan AXCP-"Milli Şura" cütlüyünün rəhbər şəxsləri arasında heç olmasa bir nəfər də olsa konstruktiv düşünə bilən, emosional radikallığa deyil, soyuq məntiq və intellektə söykənərək fikir yürütməyə, təklif verməyə cəhd göstərən bir şəxs tapıldı. Söhbət "Milli Şura"nın sədri, professor Cəmil Həsənlidən gedir.

Hazırda ABŞ-da səfərdə olan Cəmil Həsənli 2 noyabr mitinqi ərəfəsində bir müxalifətçi kimi deyil, bir alim kimi düşünərək, hər şeyi əsaslı şəkildə götür-qoy edərək, sonda maraqlı bir təkliflə çıxış edib. Feysbuk hesabında paylaşım edən Cəmil Həsənli yazıb ki, "təklif edirəm ki, MŞ KM üzvləri və AXCP rəhbərliyi mənim bu təklifimi təcili müzakirə etsin, 2 noyabr mitinqini təxirə salaq, hərəkatımızın yeni dalğası hələ indi başlayır".

Cəmil Həsənlinin paylaşımının altında rəy yazan şəxslərdən bəziləri onu bu təklifinə görə çox ciddi şəkildə qınasalar da, amma Həsənlinin bu təklifi bir daha onu göstərdi ki, siyasətdə emosiyalarla deyil, sağlam düşüncə və real politik mövqeyindən çıxış etmək lazımdır. Qoy onun bu addımı başda Əli Kərimli olmaqla, yerdə qalan radikallara da müsbət nümunə olsun.