İraq türklərinin mənəvi lideri Riyaz Sarıkahyanın ailəsinə ağır itki üz verib

İraq Türkməneli Partiyasının başqanı, türkmənlərin milli lideri Riyaz Sarıkahyanın böyük qardaşı Yılmaz Sarıkahya Ankarada haqqın rəhmətinə qovuşub. İraq türkmənlərinin tarixində böyük və şərəfli yer tutan Sarıkahyalar ailəsinin böyük oğlu Yılmaz Sarıkahyanın cənazəsi bu gün gecə saatlarında Ankaradan Kərkükə gətiriləcək.

Versus.Az xəbər verir ki, İraq Türkməneli Partiyasının rəsmisi Yılmaz Hüseynin sözlərinə görə, sabah səhər saatlarında dəfn mərasimi olacaq, Yılmaz Sarıkahya canından çox sevdiyi Kərkükdə torpağa tapşırılacaq:

“Onun dünyasını dəyişməsi təkcə ailəsi, yaxınları üçün deyil, bütün türkmənlər üçün ağır itkidir. Qiymətli böyüyümüz, ağsaqqalımız Yılmaz Abimizin xatirəsi həmişə qəlbimizdə yaşayacaq. O, aramızdan cismanı olaraq ayrılıb. Onun işıqlı xatirəsi bizimlə olacaq”.

Versus.az İnformasiya Agentliyinin kollektivi də İraq Türkməneli Partiyasının başqanı Riyaz Sarıkahyaya, Sarıkahyalar ailəsinə, Türkmən xalqına başsağlığı verir. ALLAH rəhmət eləsin. Məkanı cənnət olsun.

Ağanisə Sultan
Versus.az