Ehtiram Mehtiyev: "Bu siyasi oyunbazlara ölkənin və xalqın taleyi deyil, rahat gəlir əldə etmək maraqlıdır"

"Azərbaycanı dünyada biabır edənlər arasında "Yurd"çular (Əli Kərimçilər) da var. Bu gün özünü demokratik qüvvələrin müxalifəti adlandıran və güya hakimiyyətə gəlib xalqı "ağ günə" çıxardanlar "insan alveri" ilə məşğul olurlar".

Bu sözləri Versus.Az-a açıqlamasında AXCP sədr müavini Ehtiram Mehtiyev deyib.

Sədr müavini bildirib ki, siyasi oyunbazlara ölkənin və xalqın taleyi deyil, rahat və daha çox gəlir əldə etməyin yolları maraqlıdır:

"Təsəvvür edin, bu adamların təmsil olunduğu partiya hakimiyyətə gəlir və nə baş verdiyini siz deyin... Milli Şuranın və adıçəkilən partiyaların miqrant alveri ilə məşğul olduqlarını, saxta mübarizələrini mühacirət beznesinə çevirib və bunun üzərindən pul qazanmaqlarını dəfələrlə vurğulamışdıq. Baş verən hadisə bir daha sübut etdi ki, keçirilən aksiyalar da xalq naminə deyil, mühacir biznesinin inkişafına yönəlmişdi".

Ehtiram Mehtiyev hesab edir ki, Azərbaycan adını dünyada biabır edən bu hadisədə iqtidarın da payı var:

"Çünki, Baş Prokurorluq 3 il əvvəl bununla bağlı cinayət işi açıb, partiya rəhbərlərini çağırıb sorğu-sual edəndə nədənsə bu məsələni ictimailəşdirmədi. Yarımçıq qalan məsələnin isə bu gün acı nəticəsinin şahidi oluruq. Bu cür hadisələr Azərbaycan adına ləkədir".

SEVDA
Versus.Az