Əlabbas Məhərrəmli: "Bu qərar parlamentin indiki tərkibinin ölkədə genişlənən islahatların tələblərinə cavab verməməsindən irəli gəlib"

Xəbər verildiyi kimi, Yeni Azərbaycan Partiyasının (YAP) Siyasi Şurası parlamentdə təmsil olunan üzvlərinə parlamentin buraxılması ilə bağlı təşəbbüslə çıxış etməyi tövsiyə edən qərar qəbul edib.

Siyasi Şura sözügedən qərarını Prezident İlham Əliyevin islahatlar kursuna və kadr islahatlarına dəstək məqsədilə verildiyini qeyd edib. Maraqlıdır, Milli Məclis niyə indi buraxılır?

Məsələ ilə bağlı Versus.Az-a açıqlama verən siyasi ekspert Əlabbas Məhərrəmli növbəti seçkilərə çox az vaxt qaldığı bir vaxtda belə bir qərarın verilməsini Milli Məclisin indiki tərkibinin ölkədə genişlənən islahatların tələblərinə cavab verməməsi ilə əlaqələndirdi:

"Ona görə də, parlamentin tərkibini yeni, müasir düşüncəli insanlarla yenidən formalaşdırmaq zərurəti yaranıb. Bu gün ölkədə cox ciddi siyasi, iqtisadi islahatlar kecirilir. Qanunverici orqanın da dəyişilməsi, yenilənməsi labüddür. Fikrimcə, yaxın günlərdə növbədənkənar seçkilərin vaxtı da bilinəcək. Mən siyasi partiyalara və müstəqil fəallara üz tutaraq, bu seçkilərdə fəal olmağa, Azərbaycan parlamentinin yenilənməsində aktiv iştirak etməyə çağırıram. Millətimizə və dövlətimizə xeyirli-uğurlu olsun”.

LƏMAN
Versus.Az