Britaniya XİN-ə ən gülməli müraciətlər

Böyük Britaniyanın Xarici İşlər Nazirliyi öz saytında 2019-cu ildə yerli və xarici vətəndaşlardan gələn ən gülünc müraciətlərin siyahısını dərc edib. Bildirilib ki, 12 ay ərzində diplomatlara 330 minə yaxın zəng daxil olub.

Bu barədə Lenta.ru xəbər yayıb.

Belə ki, zəng edənlərdən biri Britaniya Xarici İşlər Nazirliyindən amerikalı repçi “50 Cent”lə danışmaq üçün onun telefon nömrəsini istəyib.

Digər bir adam təyyarədəki yeməkdən şikayətlənərək, başqa hava yolu şirkəti tərəfindən geri göndərilməsini istəyib.

Başqa bir sakin Britaniya səfirliyinə zəng edərək onun qulaqlıqlarını hoteldə axtarmasını tələb edib.

Bir qadın isə Xarici İşlər Nazirliyinə elektron poçt göndərərək, Texasda “Britaniya konsulluğundan 30 vərəqdən ibarət A4 kağızı ala bilərəmmi?”, - deyə soruşub. 

Britaniyalı qadın diplomatlardan Qətərdə bir vizajist tapmaqda kömək istəyib, çünki ordakılardan narazı qalıbmış.

Çindən olan cütlük isə süni mayalanma proseduru keçirməyi planlaşdırdıqları üçün Xarici İşlər Nazirliyindən götürülən nümunələrində milliliyyətinin yoxlanılmasını istəyib və donorun Britaniya vətəndaşlığını təsdiqləməyin nə dərəcədə mümkün olduğunu soruşub.