Ehtiram Mehtiyev: "Adını "qərbləşmə", "avropalaşma" qoyub iyrənc həyat tərzini zorla bizə sırıya bilməzsiniz"

"Hər hansı bir xalqı, dövləti yox etmək üçün onun milli dəyərlərini məhv etmək kifayətdir. Son vaxtlar milli dəyərlərimizə, adət-ənənələrimizə qarşı hücumlar o qədər intensivləşib ki, gələcəyimiz üçün yaxşı heç nə vəd etmək olmur. Hər gün qatı açılmayan iyrənc cinayətlərin şahidi oluruq. Oğul atasını öldürür, əmi qardaşı qızını qaçırır, qız öz evindən oğurluq edir, məktəb direktoru şagirdi intihar həddinə çatdırır, 10 yaşlı uşaq oğurlanıb, təcavüz edilir və daha nələr".

Bu sözləri Versus.Az-a açıqlamasında AXCP sədr müavini Ehtiram Mehtiyev deyib.

Sədr müavinini fikrincə, bu iyrənc cinayətlərin başında xüsusi missionerlərin gizli və ya açıq şəkildə təbliğatının da az rol oynamadığı şübhəsizdir. E.Mehtiyev hesab edir ki, "sapı özümüzdən olan baltalar" qərbin iyrənc "dəyərlərini" TV, KİV, QHT-lər vasitəsilə təbliğ etməklə xalqımızın ailə dəyərlərini məhv etməyə çalışırlar:

"Gənclər həyatda özlərinə yer tapsınlar deyə onlara pis vərdişləri təbliğ edərək, beyinlərini dumanlandırırlar. Adını "qərbləşmə", "avropalaşma" qoyub iyrənc həyat tərzini zorla bizə sırıya bilməzsiniz.

Bütün dövrlərdə öz soykökünə, tarixinə, milli dəyərlərinə, inanclarına qarşı çıxan millətlər müəyyən zamandan sonra məhv olmuş və tarix səhnəsindən birdəfəlik silinmişlər. Ölkəmizin inkişafı, müstəqilliyimizin daha da möhkəmləndirilməsi və milli dəyərlərin tam şəkildə bərqərar edilməsi üçün ailə dəyərlərini daim yüksəkdə tutmaq lazımdır. Bunun üçün televizyalardan Tolikləri, Xoşqədəmləri, Zaurları tarixin arxivinə gömüb, onların əvəzinə vətənpərvərliyi təbliğ edən, gəncləri təhsilə istiqamətləndirən intelektual, marifləndirici verlişlər, seriyallar, filmlər çəkilməlidir. Böyük təhlükənin qarşısını yalnız belə almış olarıq".

SEVDA
Versus.Az