ƏLİSAHİB HÜSEYNOV: "Bu da bizə, bizim seçki kampaniyamıza verilən dəstəyin bir formasıdır"

"Biz komanda olaraq bu seçki ərəfəsində hər kəsdən isti münasibət gördük. Bizi evlərinə dəvət edib bizimlə çay süfrəsi arxasında həmsöhbət olan, bizi dəstəkləyən əziz seçicilərimizdən, nurani-pirani el ağsaqqallarımızdan, ağbirçəklərimizdən tutmuş gənc könüllülərimizə qədər - hər kəsin sevgisini, sayğısını hiss etdik".

Versus.Az xəbər verir ki, bunu seçiciləri ilə görüşün təəssüratlarından danışan 125 saylı Zəngilan-Qubadlı seçki dairəsindən namizəd Əlisahib Hüseynov bildirib.

Xalqımızın böyük ruh sahibi, istiqanlı, mehriban, qonaqpərvər olduğunu qeyd edən deputatlığa namizəd deyib ki, hər bir insanımızın işıqlı iç dünyası var:

"Təbliğat-təşviqat kampaniyasının gedişində bizə göstərdikləri xoş münasibət və hər cürə dəstək də məhz içlərindəki, qəlblərindəki o işıqdan doğur. Həmçinin, posterlərimizin vitrinlərdə yapışdırılmasına icazə verən mağaza və ofis sahiblərinə də sonsuz minnətdarlığımı bildirmək istəyirəm. Sağ olsunlar! Bu da bizə, bizim seçki kampaniyamıza verilən dəstəyin bir formasıdır. 125 saylı Zəngilan-Qubadlı seçki dairəsinin əhatə etdiyi ərazilərdə posterlərin yapışdırılmasına bir çox obyekt sahibləri məmnuniyyətlə razılıq veriblər. Mən öz adımdan da, əməkdaşlarımız adından da onların hər birinə təşəkkür edirəm. İnsanlarımızla gerçəkdən qürur duyuram".

SEVDA
Versus.Az