Seçkiləri 60 minə yaxın müşahidəçi izləyəcək

Bütün seçki dairələrində müşahidə aparılması üçün ərizələrin Mərkəzi Seçki Komissiyasına təqdim edilməsi yanvarın 30-dək davam edəcək. Eyni zamanda səsvermə gününədək seçki komissiyalarının iclaslarını müşahidə etmək üçün xüsusi icazə almaqdan ötrü aktiv seçki hüququna malik Azərbaycan Respublikasının vətəndaşı (öz təşəbbüsü ilə, qeydə alınmış namizədin, siyasi partiyanın, siyasi partiyalar blokunun, seçkilər sahəsində fəaliyyət göstərən qeyri-hökumət təşkilatının təşəbbüsü əsasında) 2020-ci il yanvarın 30-dək Mərkəzi Seçki Komissiyasına müraciət etməlidir.

Müəyyən seçki dairəsinin hüdudlarında müşahidə aparmaq üçün isə vətəndaşlar ərizələrini müvafiq dairə seçki komissiyasına 2020-ci il fevralın 4-dək təqdim etməlidirlər.

Milli Məclisdə seçkilərlə əlaqədar 27 yanvaradək 55 min 292 yerli müşahidəçi qeydiyyatdan keçib.

Yanvarın 27-nə olan rəsmi məlumata görə, Milli Məclisə seçkilərlə əlaqədar 409 beynəlxalq müşahidəçi akkreditasiyadan keçib.

Proses davam etdiyindən bu rəqəmlərin artacağı gözlənilir.

Mərkəzi Seçki Komissiyasının (MSK) sədri Məzahir Pənahov deyib ki, siyasi partiyalar parlament seçkiləri ilə bağlı müraciətə əməl etməyib. O bildirib ki, qanunvericiliyin tələbinə görə, əgər öz təşəbbüsü ilə deputatlığa namizədliyini irəli sürən şəxslər siyasi partiyadan kənarlaşdırılırsa, siyasi partiya üzvlüyünə partiya tərəfindən xitam verilirsə, bununla bağlı həmin siyasi partiya Mərkəzi Seçki Komissiyasına məlumat verməli idi.

Məzahir Pənahov xatırladıb ki, MSK-nın keçən iclası zamanı partiyalara müraciət edərək növbəti iclasa qədər siyasi partiyaların bununla bağlı məlumat vermələrini xahiş etmişdi. Amma bu müraciətə əməl olunmayıb:

“Ona görə hesab edirəm ki, məsələ ilə bağlı heç kəs bizdən inciməsin”.

Mərkəzi Seçki Komissiyasının (MSK) katibi Mikayıl Rəhimov isə secki-2020.az saytına açıqlamasında deyib ki, Milli Məclisə seçkilərdə gözdən əlil seçicilərin səs verməsi üçün Brayl əlifbası ilə seçki bülletenləri çap olunacaq. Onun sözlərinə görə, bütün seçki məntəqələrinə Brayl əlifbası ilə hazırlanan bülletenlər veriləcək.

MSK katibi deyib ki, hazırda bununla bağlı proses başlayıb:

“Biz həmişə bunu tətbiq etmişik. Gözdən əlil seçicilərin səs verməsi üçün bütün məntəqələrin seçki bülletenləri ilə təmin olunması nəzərdə tutulub. Mərkəzi Seçki Komissiyası bununla bağlı Əmək və Əhalinin Sosial Müdafiəsi Nazirliyi ilə birlikdə müzakirələr aparır və ehtiyacı olan bütün məntəqələr lazım olan seçki bülletenləri ilə təmin ediləcək. Hər kəs diqqət mərkəzindədir və heç kəs diqqətdən kənarda qalmayacaq. Gözdən əlil seçicilərin də səsvermə hüquqları var, onların bu hüquqları tanınır”.

M.Rəhimov gözdən əlil seçicilərin səsvermə hüququndan istifadəsində heç bir problemin olmayacağını vurğulayaraq söyləyib:

“Mərkəzi Seçki Komissiyası bundan öncəki seçkilərdə də gözdən əlil seçicilərin səsvermə hüququndan istifadəsi üçün lazımi şərait yaradıb. Bu istiqamətdə heç bir problem yoxdur. Gözdən əlil seçicilərin səs vermək üçün məntəqəyə gəlməsinə, səsvermə kabinetinə daxil olmasına digər seçicilər kömək edə bilər. Lakin Brayl əlifbası ilə hazırlanmış bülleteni aldıqdan sonra onlar rahat şəkildə öz hüquqlarından istifadə edə bilərlər”.

Versus.Az