Mənim balaca aləmim

Ayla Nəcəfli

/Şuşa rayon 6 saylı orta məktəbin 3-cü sinif şagirdi/

Yay tətilinə düz dörd gün qalıb. Məktəbdə   bütün işlərim əla getdi. Dərslərimi super oxuyuram. Keçən il yay tətilində çox   əyləndim. Ümid edirəm ki, bu yay tətili də  əyləncəli olacaq. Üçüncü sinifdə məni   sevindirən və məyus edən hadisələr oldu. İndi onları sizinlə bölüşəcəm.

Məni ən çox sevindirən an şəklimin şərəf lövhəsinə vurulmasıdır. Sonra bu xəbəri bütün ailə üzvlərimə – anama, atama, bacıma xalalarıma böyük həvəslə çatdırdım. Hamı məni təbrik etdi. Uğuru bölüşmək çox gözəl bir hiss idi. Hər məktəbə gedəndə bir anlıq şərəf lövhəsinin qarşısında dayanıb, şəklimə baxıram, adımı səslə oxuyuram – Nəcəfli Ayla Ramil qızı.

Ailəm və müəllimlərim mənimlə fəxr etdilər. Amma bəzi sinif yoldaşlarım əlaçı olduğuma görə məni qısqandılar.

Məni məyus edən anlar da oldu. Bir sinif yoldaşım (adını deməyəcəm) müəlliməmi o qədər hirsləndirdi ki, müəlliməmin boğazı şişib xəstələndi. Məni də dərs zamanı danışdırıb dərsdən yayındırdığı üçün onunla tənəffüsdə dalaşmışdım. Ondan zəhləm gedir… Müəlliməmə uzun ömür, cansağlığı arzu edirəm.

Hələlik. Acmışam, nahara gedirəm. Amma söz verirəm ki, gələn dəfə mən öz balaca aləmim haqqında ən adi yadda qalan anlarımı belə, sizinlə bölüşəcəm.