Doktor Dulittlın heyrətamiz səyahəti filminin qapalı təqdimatı keçirildi

“CinemaPlus” kinoteatrında Doktor Dulittlın heyrətamiz səyahəti filminin premyera öncəsi qapalı təqdimatı keçirildi.

Versus.Az xəbər verir ki, film əsl dostluqdan, mehriban münasibət və sədaqətdən bəhs edir.

Viktorian İngiltərədə yaşayan və heyvanların dilini anlayan məşhur həkim-veterinar Dulittl yeddi il öncə həyat yoldaşını itirdikdən sonra qapalı həyat tərzi sürür. Yanındakı canlılar yalnız heyvanlar aləmindən ibarətdir.

Doktor heç kəsi görmək istəmir və müalicə fəaliyyətindən belə əl çəkib. Amma gənc şahzadə Viktoriyanın həyatına təhlükə yaradan anlaşılmaz bir xəstəlik Dulittlı sığınacağından çıxararaq bu dərdin dərmanını tapmaq üçün qorxulu və mifik bir səyahətə çıxmağa məcbur edir.

Filmin rejissoru Stiven Geyqan, baş rollarda kiçik Robert Dauni, Antonio Banderas, Harri Kollett, Maykl Şin və başqaları çəkilmişdir.

Film tamaşaçının diqqətini ekzotik səhnələrlə cəlb edir.

Ayəndə Dadaşova
Versus.Az