Akif Nağı: "istənilən nəticəyə nail olmaq üçün icazəli aksiyalara ehtiyac var"

“Biz Qarabağ Azadlıq Təşkilatı (QAT) olaraq indiki məqamda icazəsiz aksiyanın keçirilməsini məqsədəuyğun hesab etmədik”.

Bunu Versus.Az-a Qarabağ Azadlıq Təşkilatının (QAT) rəhbəri Akif Nağı may ayının 12-nə təyin olunan mitinqin təxirəsalınma səbəblərindən danışarkən bildirib.

A.Nağının sözlərinə görə, Bakı Şəhər İcra Hakimiyyətindən (BŞİH) müraciətə rəsmi cavab verilməyib. Şifahi olaraq elə sözlər deyilib ki, bu daha çox imtinaya bənzəyib. QAT və mitinqin digər təşkilatçıları belə qərara gəliblər ki, icazəsiz mitinqə getməyə ehtiyac yoxdur.

A.Nağı mitinqin təxirə salınmasının bugünkü durumla bağlı olaraq adekvat reaksiyalar doğurmasını da təbii sayıb:

“Belə fikirlər səsləndi ki, Qarabağla bağlı mitinqin keçirilməsi üçün icazəyə ehtiyac yoxdur. Vətəndaşlar işğal altında qalan torpaqlarının azad olunması naminə öz sözlərini deməlidir. Amma öz torpağında məcburi köçkün olan insanların iradəsinin ortaya qoyulması və istənilən nəticəyə nail olmaq üçün icazəli aksiyalara ehtiyac var. Əgər mitinq icazəsiz olduğuna görə polis tərəfindən dağıdılsa, bu, məqsədimizə nail olmamaqla yanaşı  insanların gözünü bir az da qırmış olardı. Ona görə də hesab edirik ki, hakimiyyət Qarabağ mitinqinə icazə verməlidir”.

QAT sədri xalqın Qarabağla bağlı öz iradəsini ortaya qoymaq istəyini nəzərə alaraq, kütləvi tədbirlə bağlı BŞİH yenidən müraciət edəcəklərini deyib.

Ləman
Versus.Az