Azercell 5728 aztəminatlı ailəyə dəstək oldu

Novruz bayramı və koronavirus (COVİD-19) infeksiyası ilə mübarizə çərçivəsində ölkənin lider mobil operatoru olan “Azercell Telekom” bu dəfə də həssas qrup kateqoriyadan olan insanlara öz qayğısını əsirgəmədi.

“Azercell Telekom”dan Versus.Az-a verilən məlumata görə, şirkət sosial məsuliyyət strategiyası çərçivəsində “Regional İnkişaf” İctimai Birliyi (RİİB) ilə birlikdə Əmək və Əhalinin Sosial Müdafiəsi Nazirliyi tərəfindən müəyyən edilən siyahı üzrə Bakı şəhərində yaşayan, I qrup əlilliyə görə sosial müavinət alan ailə üzvü olan 5728 aztəminatlı ailəyə bayram sovqatı verilib. Sovqatlar ünvanlara Nəqliyyat, Rabitə və Yüksək Texnologiyalar Nazirliyinin “Azərpoçt” MMC tərəfindən çatdırılıb.

“Azercell” və RİİB tərəfindən həyata keçirilən bu təşəbbüs həssas təbəqədən olan insanların sosial rifahını yaxşılaşdırmaqla yanaşı, dövlətin koronavirus infeksiyanın yayılmasının qarşısının alınması və onunla mübarizə sahəsində sosial izolyasiya tədbirlərinə də dəstək məqsədi daşıyır.

“Azercell Telekom” və RİİB tərəfindən bu cür xeyirxah təşəbbüslərin davamlı olaraq bundan sonra da həyata keçirilməsi nəzərdə tutulur.