Sülhəddin Əkbər: “Müxalifətlə dialoqa başlamaq istiqamətindəki addımlarının ilk işartıları görünməkdədir”

“Azərbaycan hakimiyyətinin ölkənin siyasi sistemini yeni konfiqurasiyada qurmaq və bu məqsədlə də müxalifətlə dialoqa başlamaq istiqamətindəki addımlarının ilk işartıları görünməkdədir. Belə ki, Prezident Administrasiyasının Siyasi partiyalarla və qanunvericilik orqanıyla iş şöbəsinin müdiri Ədalət Vəliyevin müxalif partiya sədrləriylə görüşlərinin, eləcə də son müşavirədə Prezident İlham Əliyevin müxalifətlə dialoqun vacibliyi haqda çağırışlarının ardınca hökumət indiyədək qeydiyyatına süni əngəllər yaradılan partiyaların dövlət qeydiyyatına alınmasına da başlayıb”.

Versus.az xəbər verir ki, bunu Ədliyyə Nazirliyində dövlət qeydiyyatına alınan müxalif siyasi təşkilatlardan biri olan Azad Demokratlar Partiyasının sədri Sülhəddin Əkbər bildirib.

Partiya sədri Azad Demokratlar Partiyasının 2014-cü ilin 6 iyulunda təsis edilsə də, indiyədək qeydiyyatdan keçirilmədiyini deyib.

Xatırladaq ki, bu partiyanın sədri Elçibəy hakimiyyəti dövründə Milli Təhlükəsizlik nazirinin birinci müavini vəzifəsində işləyib.

Qeyd edək ki, Sülhəddin Əkbər uzun illər İsa Qəmbərin başqanlıq etdiyi Müsavat Partiyasında Məclis sədri, sonra Rəsul Quliyevin liderlik etdiyi Açıq Cəmiyyət Partiyasının sədri olub. 2014-cü ilin 6 iyulundan isə ACP-dən ayrılaraq, tərəfdarlarıyla birgə Azad Demokrtlar Partiyasını yaratdığını elan edib.

SEVDA
Versus.az