Razi Nurullayev: "İşçilərinizə çoxistifadəlik maskalar alın, bunu vətəndaşların öhdəsinə buraxmayın"
"Prezident İlham Əliyev tibbi maska taxıb. Bunun açılışı budur ki, dünən qəbul olunan və Prezident tərəfindən təsdiq edilən qanun qarşısında hamı bərabərdir və maska taxmayanlara güzəşt edilməyəcək".
Versus.Az xəbər verir ki, bu barədə "facebook" hesabında millət vəkili Razi Nurullayev bildirib.
Deputat qeyd edib ki, Prezidentin maska taxaraq demək istədiyi budur - "maska taxın, özünüzü və yaxınlarınızı qoruyun".
Ən ucuz maskanın 30 qəpik olduğunu vurğulayan R.Nurullayev qeyd edib ki, həkimlər də 30 qəpiklik masqanın iki saatdan çox geyiləndə virus daşıyıcısına çevrildiyini deyib:
"Demək ki, işə gedən vətəndaşa gündə maska üçün iki manat lazımdır. Bu isə vətəndaşın gəlirinə adekvat deyil. Onun üçün də işəgötürənlərə çağırış etmək istəyirəm ki, öz işçilərinizə çoxistifadəlik maskalar alıb verin, bunu vətəndaşların öhdəsinə buraxmayın. Bu sizin dövlət üçün gördüyünüz ən gözəl işlərdən biri olar. Mən öz tibbi maskamı iki manata almışam və hələ də istifadə edirəm. Yaxşı yuyulur, ütülənir və istifadəyə yararlıdır.
Masqaların pulsuz paylanması da real görünmür. Çünki bu işi quranların pul qazanmaq marağı olmasa, istehsal olmaz. Eyni zamanda hökumətin də dotasiya vermək imkanları nəzərdən keçirilməlidir ki, uzun müddət maska ilə yaşamalı olsaq, bəzi vətəndaş kateqoriyalarına pulsuz maska təminatı həyata keçirilsin."
SEVDA
Versus.Az