Dedim, bəs sən mənnən məzələnib, zurna ala bilirsən?..

Deyir ki, -  “Bir dəfə Sabir Rüstəmxanlı ilə yasa gedirdik. Bir dostumuzun yaxını rəhmətə getmişdi. Yasa üç nəfər getməli idik. Oturdum Sabirin maşınına, getdik üçüncü dostumuzu da evindən götürməyə. Yolda Sabir mənə bir bağlama verdi ki, sənə Türkiyədən hədiyyə gətirmişəm. Amma açma, evdə açarsan. Dedim ki, evə niyə saxlayıram e, mənə almısansa, elə burda açacam. Dirəndi ki, yox evdə açarsan. Dözmədim, bağlamanı açdım. Baxdım ki, bir dənə zurnadı. Guya məni dolamaq üçün zurna alıb Türkiyədən. Mən də eləmədim tənbəllik, zurnanı aldım əlimə, başladım çalmağa. İndi biz maşında gedirik, pəncərəni açmışam, zurna çalıram. Hamı da Sabiri tanıyır axı, baxırlar ki, Sabir Rüstəmxanlı maşınla gedir, yanında oturan bir adam da ona zurna çalır. Sabir nə qədər yalvardı, fikir vermədim. Dedim, bəs sən mənnən məzələnib, zurna ala bilirsən?..”

Qayğıkeş, mehriban, çox nikbin adamdır. Yumor hissi güclü olduğundan münasibətdə olduğu insanlarda xoş əhval-ruhiyyə yaradır. Gözəl musiqi duyumu var. Gənc yaşlarından bir neçə musiqi alətini dilləndirə bilir. Natiqdir, dəvət olunduğu məclislərdə mənalı çıxışları ilə hamını özünə heyran edir, hər dəfə yeni fikir söyləməyi bacarır...

1947-ci ildə Yardımlının ucqar dağ kəndi Şıxlarda dünyaya gəlib. Səkkizinci sinfi doğma ata-baba yurdunda başa vurduqdan sonra, Zaqatala Pedoqoji Texnikumunda təhsilini davam etdirib. 1967-1972-ci illərdə Azərbaycan Dövlət Pedoqoji Universitetinin filologiya fakültəsində ali təhsilə yiyələnib. Əmək fəaliyyətinə sıravi müəllimlikdən başlasa da, sonradan Yardımlı rayon Komsomol Komitəsinin şöbə müdiri, birinci katibi vəzifələrinə qədər yüksələ bilib. 1975-1977-ci illərdə Prezident yanında İdarəçilik Akademiyasında dövlət quruculuğu və politologiya ixtisası üzrə təhsil alıb. 1977-ci ildən Yardımlı rayon Partiya Komitəsinin təşkilat şöbəsində işləməyə başlayıb. 1979-1982-ci illərdə Yardımlı rayon Xalq Nəzarəti Komitəsinin sədri olub. 1982-1989-cu illərdə rayon Mədəniyyət şöbəsinə rəhbərlik edib. 1989-cu ildə Abşeron rayon Partiya Komitəsində partiya Komissiyasının sədri vəzifəsinə təyin olunub. 1991-ci ildən Milli Məclisdə çalışır. Bir müddət Milli Məclisin Vətəndaşların qəbulu və müraciətləri ilə iş şöbəsinin müdiri vəzifəsində işləyib.

Uzun müddət dövlət qulluğunda səmərəli fəaliyyətinə görə "Dövlət qulluğunda fərqlənməyə görə” medalı ilə təltif edilib. Haqqında “Adım andımdır” kitabı işıq üzü görüb...

Təvazökardır. Onunla münasibət qurmaq elə də çətin deyil. Həmsöhbətini səbrlə dinləməyi bacarır. Qarşı tərəfdə səmimiyyət gördüsə ürək qızdırıb, mehribanlıq göstərir, özünü ifadə etməyə şərait yaradır. İnsanlara maddi imkanlarına görə deyil, intellektinə, təfəkkürünə, necə deyərlər, ağlına görə dəyər verir. Zəngin dünya görüşü var. Bütün mövzularda fikir yürüdə bilir. Onunla söhbət etmək üçün təzə, ən maraqlı xəbərləri, elmi və ya sosial-siyasi xarakterli məlumatları bilmək lazımdır...

Duyğusal, romantik, şair təbiətli insandır. Poeziyanın vurğunudur. Klassiklərdən tutmuş müasir şairlərə kimi hər kəsin yaradıcılığından xəbərdardır. Çox adam bilməsə də, özü də şeir yazır. İndiyədək heç yerdə çap olunmayan gözəl poeziya nümunələri yarada bilib.

Deyir ki,-  “Mən yazıram, amma çap etdirmək, kitab çıxarmaq fikrim yoxdur. Özüm üçün, öz ehtiyacım üçün yazıram. Şeir mənə çox kömək eləyir. Cavanlıqda sevgi üçün kömək eləyirdi, indi başqa mənəvi problemlərə kömək eləyir. Bu mənə bəsdir.”

Bu şeiri isə çağdaş Azərbaycan poeziyasının ünlü nümayəndələrindən biri- parlaq istedadlı şair Elçin Mirzəbəyli Onun haqqında yazıb:

…Xoş sözə, düz sözə qulağı açıq,
Ata ocağıdı, qucağı açıq,
Mərdə evi açıq, ocağı açıq,
Namərd qarşısında buz kimi adam.

…Niyyəti- saf niyyət… Amalı ulu,
Qəlbi sevgi dolu, mərhəmət dolu.
O, özü bir yoldu- qardaşlıq yolu –
Çığır kimi adam, iz kimi adam…

Haqqında sevə-sevə söhbət açdığım İbrahim Yusifzadənin iyunun 10-da 73 yaşı tamam olur. Onu bu münasibətlə təbrik edir, möhkəm can sağlığı, firəvan həyat arzulayıram.
Yeni yaşınız mübarək, İbrahim müəllim!

Elman Eldaroğlu
Versus.Az