“COVID-lə mübarizədə nəticələr bizi qorxudur”

"Heç bir hökumət, heç bir dövlət tərəfindən arzu edilməyən qərarlarla qarşı-qarşıyayıq".

Versus.az xəbər verir ki, bunu Nazirlər Kabineti yanında Operativ Qərargahın eksperti, deputat Rəşad Mahmudov bu gün keçirilən brifinqdə bildirib.

O qeyd edib ki, hər bir ölkə fərqli metodlar tətbiq etməklə virusla mübarizə aparır:

"Virusun yayılmasında günahkar axtarmaq lazım deyil. Amma son 1 ayın nəticələri göstərdi ki, bütövlükdə cəmiyyətin qaydalara riayət etməməsilə daha ağır qərarlar vermək məcburiyyətindəyik. Hazırda 11 329 nəfər virusa yoluxub, bu isə 2,5 faizlik yoluxma deməkdir".

R.Mahmudov deyib ki, yay aylarında çətin də olsa yeni nizama uyğun həyat sürməliyik.

Onun sözlərinə görə, pandemiyanın bizə diqtə etdiyi vəziyyətlə mübarizə aparmaq məcburiyyətindəyik: 

"Yumşalma mərhələsindən sonra yenidən sərtləşməyə qərar verməyə məcbur olduq. Bu gün xəstəxana çarpayılarının getdikcə məhdud olması, COVİD-lə mübarizədə yeni nəticələr bizi ciddi qorxudur. Dövlət başçısının tapşırığı ilə ilkin mübarizə bütün dünya ölkələri üçün nümunə idi. Amma indi yaranmış vəziyyət Azzərbaycan dövlətini yenidən sərt addımlar atmağa vadar edir".