Rəhim Qəmbərov: “Onlar dövlətimizin imicinə kölgə salmaq istəyrlər”

“Dövlətin koronavirusla mübarizə apardığı və hətta müxalifət partiya rəhbərlərinin də bu mübarizədə iqtidara dəstək olduğu bir vaxtda düşmən dəyirmanına su tökən bəzi sapı özümüzdən olan “balta”lar öz çirkin əməllərindən əl çəkmirlər. Onlar ölkədə yaranmış gərginliyə siyasi don geyindirməklə dövlətimizin imicinə kölgə salmaq istəyrlər”.

Bunu Versus.Az-a açıqlamasında Müasir Müsavat Partiyasının Nərimanov rayon təşkilatının sədri Rəhim Qəmbərov bildirib.

Təşkilat sədri qeyd etdi ki, təbii olaraq koronavirus təhlükəsi, karantin rejimi insanları yorur, psixolojisini pozur. Bu zaman özlərindən asılı olmayaraq şikyətlənirlər ki, dağıdıcı qüvvələr də bundan öz xeyirlərinə yararlanırlar:

“Kimin nə problemi varsa sanki karantin rejimi olduğu bir vaxtda qalıbmış kimi məhz bu ərəfələrdə narazılıq etməyə başlayıblar. Bir-iki adını müxalifət qoymuş adamlar da onları danışdırıb çəkir, sonra sosial şəbəkələrdə yayırlar ki, bəs dövlət başçısı öz vətəndaşının qayğısına qalmır. Soruşuram, necə qalmır ki, az qala bütün xəstəxanaları koronavirus xəstələri üçün ayrılmasına göstəriş verir, xüsusi xəstəxanalar açdırır, imkansız insanları dövlət yardımı ilə təmin edir? Bu qədər də insafsızlıq, naşükürlük olmaz axı. Dövlət öz vətəndaşlarını bu pandemiya bəlasından az itkiylə çıxarmaq istəyir. Buna görə vacib bilinən bütün tədbirləri görür. Bəs insanlarımız neyniyir? Nə tibbi qaydalara əməl edirlər, nə də karantin qadağalarına”.

R.Qəmbərovun sözlərinə görə, bu azmış kimi burdakı havadarlarının sayəsində xaricdə sığınacaq tapıb ordan Azərbaycan əleyhinə çıxışlar edən bir neçə dələduz da bir tərəfdən insanları çaşdırır:

“Milli şura deyilən bir qurum var, guya ağıllı adamlar yığışıb orda problem müzakirə edirlər. Öz davranışlarındakı, danışıqlarındakı anormallığı nümayş etdirməkdən başqa heç nə etmirlər. Biz MMP olaraq vətəndaşlarımıza müraciət edirik ki, o cür araqarışdıran, mənfur fikirli insanlara fikir verməsinlər. Gəlin ölkə rəhbəriylə əl-ələ verib ölkəmizin bu bəladan tez və az itkiylə qurtarmasına çalışaq. Bunun üçün bizlərə sadəcə qoyulan qadağalara riayət etmək qalır”.

SEVDA
Versus.Az