"Biz gördük ki, uzanan sülh danışıqları heç bir nəticə vermir"

09:21 15-07-2020 | 316 | Siyasət

Fuad Əliyev: "Dünyaya göstərdik ki, güclü ordumuz var və istənilən vaxt torpaqlarımızı azad etməyə qadirik"

Azərbaycan Liberal Demokrat Partiyasının (ALDP) sədri Fuad Əliyev "Kanal-13"-ə müsahibə verib.

Versus.Az həmin müsahibəni təqdim edir:

ALDP sədri müsahibəsində bildirib ki, beynəlxalq təşkilatlar bu məsələdə müəyyən qədər susur:

"Bu münaqişə başlayanda ALDP bu məsələnin sülh yolu ilə həllin tərəfdarı idi. Amma son 10 ildir ki, biz münaqişənin hərb yolu ilə həllin tərəfdarı olduq. Çünki biz gördük ki, uzanan bu sülh danışıqları heç bir nəticə vermir. Və beynəlxalq təşkilatların, bizim haqlı olduğumuza dair verdiyi bəyanatlar vaxtın uzadılmasına xidmət edir. Biz BMT TŞ-nın 4 qətnaməsini əsas tutaraq işğalda olan torpaqlarımızı azad etməliyik. Hakimiyyət daxilində də bu fikirdə olanlar çoxalır. Misal üçün Səməd Seyidovun “Bizim ATƏT-in Minsk qrupu ilə yollarımız ayrılacaq” fikirlərini müsbət qiymətləndirirəm.

“Niyə beynəlxalq hüquqa əsaslanaraq, topaqları azad etmirik” sualına ALDP sədri belə cavab verdi:

“Hakimiyyət uzun illərdir ki, sülh danışıqlarında iştrak edir. Və hesab edirdilər ki, bu məsələni sülh yolu ilə həll edə bilərlər. Və 2016-cı ildə aprel döyüşləri onu göstərdi ki, artıq hakimiyyət daxilində münaqişənin hərb yolu ilə həllinin tərəfdarları var. Aprel döyüşləri ermənilərə və beynəlxalq təşkilatlara bir ismarıc idi. Biz dünyaya göstərdik ki, bizim ordumuz var və biz istənilən vaxt işğalda olan torpaqlarımızı azad etməyə qadirik.”