Prezidentə, Milli Məclisə müraciət edilməsi məqsədilə QHT, KİV nümayəndələrinə və ziyalılara çağırış ediləcək

Azərbaycan Milli İstiqlal Partiyasının Qərargahında Azərbaycan Liberal Demokrat Partiyasının (ALDP) sədri Fuad Əliyev AMİP sədr əvəzi Arzuxan Əlizadə və BAP sədri Elşad Musayev arasında görüş keçirilib.

Versus.Az xəbər verir ki, görüşdə ölkədəki ictimai-siyasi vəziyyət, pandemiyanın törətdiyi fəsadlarla bağlı vətəndaşları narahat edən məsələlər, eləcə də Ermənistanın iyulun 12-dən başlayan təxribatları geniş müzakirə olunub.

Sədrlər həmçinin partiyalar arasında əlaqələrin gücləndirilməsi istiqamətində fikir mübadiləsi aparıb və bu istiqamətdə birgə təşəbbüslər çıxış etməyin əhəmiyyətli olduğunu vurğulayıblar.

Görüşdə həmçinin 14 iyul gecəsində vətəndaşların ordumuza və əsgərimizə birlik birlik nümayişi, eləcə də ayrı-ayrı ölkələrdə keçirilən dəstək aksiyaları yüksək qiymətləndirilib.

Partiya rəhbərləri arasında keçirilən görüşdə 14 iyulun Birlik günü elan olunması üçün Prezidentə və Azərbaycan Respublikası Milli Məclisinə müracitə edilməsi məqsədilə siyasi partiyalara, Qeyri Hökümət Təşkilatlarına, KİV nümayəndələrinə, o cümlədən də ziyalılara çağırışlar edilməsi qərara alınıb.

LƏMAN
Versus.Az