Vəndamda Polad Həşimovun xatirəsi belə əbədiləşdirildi

Cəbhənin Tovuz rayonu istiqamətindəki qanlı döyüşlərdə qəhrəmancasına şəhid olan (iyulun 14-də) general-mayor Polad Həşimovun valideynlərinin dogma kəndində posteri asılıb... 

Bu barədə Versus.Az-a Qəbələ rayonunun Vəndam kəndinin sakinləri məlumat veriblər. Qeyd edək ki, Polad Həşimov əslən bu kənddəndir.

Sakinlər bildiriblər ki, kənddə asılmış nəhəng poster onlara fəxarət hissi yaşadır.

Əslən Qəbələnin Vəndam kəndindən olan general-mayor Polad İsrayıl oğlu Həşimov 1975-ci ildə Sumqayıtda doğulub. Orta məktəbi də elə həmin şəhərdə bitirib. Ali hərbi məktəbi Azərbaycanda, hərbi akademiyanı isə Türkiyədə oxuyub. 

2003-cü ildə "Hərbi xidmətlərə görə " medalı ilə təltif edilib. 2009-cu ildə isə "Vətən uğrunda" medalına layiq görülüb. 2014-cü ildə III dərəcəli "Vətənə xidmətə görə" ordeni ilə təltif edilib. 2016-cı ildə "Aprel döyüşləri" zamanı göstərdiyi qəhrəmanlığa görə,  II dərəcəli "Vətənə xidmətə görə" ordeninə layiq görülüb. 

2019-cu ilin 24 iyununda Polad Həşimova general-mayor rütbəsi verilib. İki oğlu və bir qızı var.