Əlisahib Hüseynov: "Bu, Eldar Həsənovun öz işinin öhdəsindən layiqincə gələ bilməməsinin nəticəsidir"

"Azərbaycanın Serbiya, Monteneqro, Bosniya və Hersoqovinadakı səfiri Eldar Həsənovun Dövlət Təhlükəsizlik Xidməti (DTX) tərəfindən şübhəli şəxs qismində tutulmasına müxtəlif rakurslardan yanaşmaq olar və bu barədə cürbəcür sübyektiv mülahizələr irəli sürmək olar".

Versus.Az xəbər verir ki, bunu açıqlamasında DADP sədri Əlisahib Hüseynov bildirib.

"Faktları, həqiqətləri heç kim inkar edə bilməz" deyən partiya sədri qeyd edib ki, fakt isə budur ki, Tovuz döyüşlərindən sonra Serbiyanın Ermənistana silah göndərməsi bir səfir kimi bilavasitə Eldar Həsənovun öz işinin öhdəsindən layiqincə gələ bilməməsinin nəticəsidir:

"Daha doğrusu, bu bir səfir üçün əsl rüsvayçılıqdır. Üstəgəl, XİN sistemində maliyyə yoxlamaları zamanı səfir Eldar Həsənov tərəfindən xeyli miqdarda büdcə vəsaitinin başqa təyinat üzrə istifadə edilməsi və digər qanun pozuntularının törədilməsinə dair əsaslı şübhələrin ortaya çıxması faktını da bura əlavə etsək, deməli, həbslər bununla bitməyəcək. Bu gedişlə Xarici İşlər Nazirliyi sistemində və bütövlükdə ölkənin diplomatik korpusunda yeni həbslərin davam etməsi mümkündür. Eldar Həsənovun həbsi ölkə diplomatiyasının şübhəli şəxslərdən, uğursuz kadrlardan, öz işinin öhdəsindən gələ bilməyən diplomatlardan təmizlənməsi prosesinin davamıdır".

Versus.Az