İcra başçısı gərəkən addımların atılacağını bildirib

Bugünlərdə Milli Məclisin Mədəniyyyət Komitəsi tərəfindən Gəncə şəhərindən bir qrup ziyalının müraciəti əsasında Gəncə şəhər İcra hakimiyyətinə məktubla müraciət edilib.

Versus.Az xəbər verir ki, bu barədə Komitənin sədri Qənirə Paşayeva bildirib.

Qeyd edək ki, müraciətdə Hacı Mir Qasım Ağanın 1914-cü ildə Gəncəyə çəkdirdiyi kəhrizin bərpa olunması məsələsinə baxılması xahiş edilib.

Millət vəkili Qənirə Paşayeva qeyd edib ki, məsələ ilə bağlı Gəncə şəhər İcra hakimiyyətinin başçısı Niyazi Bayramovla telefonla danışıb və başçı məsələnin araşdırıldığını, gərəkən addımların atılacağını bildirib:

"Hacı Mir Qasım Ağa kəhrizinin bərpasını, cənab Prezidentin 23 iyulda ölkənin su təsərrüfatının mövcud vəziyyəti, qarşıda duran vəzifələr barədə keçirdiyi video-müşavirədə qaldırdığı məsələlərin həllinə bir töhfə, özünəməxsus xidmət dəyərində olduğuna inanıram.

Hörmətli Niyazi müəllimə operativ və olumlu reaksiyası üçün bir daha təşəkkürlərimi yetirirəm. Hesab edirəm, bu kəhrizin bərpası həm şəhərdə içməli su üçün, həm də bir tarixi-mədəni abidə olmaq etibarı ilə qorunması baxımından çox önəmlidir".

PƏRİ
Versus.Az