Əli Həsənov bu xəbəri də təkzib etdi: Əli Həsənova məxsus bina boşaldılır

Beynəlxalq Mətbuat Mərkəzi (BMM) Prezidentin keçmiş köməkçisi Əli Həsənovun nəzarətindən çıxır. 

 

Versus.Az Yenisabah.az-a istinadən xəbər verir ki, yaxın günlərdə BMM-in binasının boşaldılmasına başlanılacaq. 

 

Əli Həsənov tutduğu vəzifəsindən azad ediləndən sonra BMM fəaliyyətini dayandırmışdı.

 

Mərkəzin konfrans zalı təşkilatlardan birinə icarəyə verilmişdi. 

 

BMM-in yerləşdiyi binanın bütövlükdə Əli Həsənova məxsus olması barədə iddialar var. Həmin binada Prezidentin keçmiş köməkçisinin nəzarətindən olan media qurumları və təşkilatların yerləşməsi bu iddiaların əsassız olmadığına şübhələri artırır. 

 

Məlumatlarda qeyd edilir ki, Əli Həsənov təkcə BMM-i deyil, bütövlükdə binanı itirə bilər.

 

Xəbərə görə, bu ayın sonuna kimi binanın tam boşaldılması tələb olunub. Artıq bir sıra media şirkəti binanı tərk edib. Banklardan biri filial üçün kirayə götürdüyü otaqları təhvil verib.

 

Qeyd edək ki, Əli Həsənov Versus.Az-a açıqlamasında digər məlumatlar kimi, bunun da yalan olduğunu bildirdi:

 

"Təəssüf, bu bir neçə sayt - "Axar", "Demokrat", "Yeni Sabah", "Yeni Çağ" və bir neçə digərləri mənim haqqımda yalanlar uydurmaqla çörək qazanırlar. Fantaziyalarının və yalanlarının da həddi-hüdudu və sərhədləri yoxdur".