Beynəlxalq Dialoq və İnkişaf Alyansı BƏYANAT yayıb

15:06 28-09-2020 | 345 | Cəmiyyət

"Ermənistana qarşı ciddi sanksiyalar tətbiq etməyə və təcili tədbirlər görməyə çağırırıq"

Beynəlxalq Dialoq və İnkişaf Alyansı işğalçı Ermənistanın Azərbaycana qarşı növbəti 27 sentyabr 2020-ci ildə hərbi hücum təxribatı ilə bağlı bəyanat yayıb.

Bu barədə Versus.Az-a Beynəlxalq Dialoq və İnkişaf Alyansının sədri Nüşabə Məmmədova məlumat verib.

Qeyd edək ki, Bəyanat Birləşmiş Millətlər Təşkilatının Təhlükəsizlik Şurasına, Birləşmiş Millətlər Təşkilatının Təhlükəsizlik Şurasının sədrinə, ATƏT Minsk Qrupu ölkələrinin rəhbərlərinə, Amerika Birləşmiş Ştatlarının Prezidentinə, Rusiya Fedearsiyasının prezidentinə, Fransa prezidentinə göndərilib.

Bəyanatda bildirilir:

"Ermənistan silahlı qüvvələri tərəfindən cəbhə bölgəsində sıx məskunlaşmış kəndlərin atəşə tutulması nəticəsində ölən və yaralanan mülki şəxslər var. Çox sayda ev və mülki obyekt ciddi şəkildə ziyan görüb. Ermənistan tərəfindən qəsdən yaşayış məntəqələri və mülki şəxslərin hədəf alınması 1949-cu il Cenevrə Konvensiyası da daxil olmaqla beynəlxalq humanitar hüququn kobud şəkildə pozulmasıdır.

Ermənistan BMT Təhlükəsizlik Şurasının 822, 853, 874 və 884 saylı qətnamələrini və digər nüfuzlu beynəlxalq təşkilatların qətnamələrini və çağırışlarını məhəl qoymur, beynəlxalq hüququn norma və prinsiplərini kobud şəkildə pozur. Ermənistanın bölgədə yaratdığı potensial təhlükəli vəziyyət beynəlxalq təşkilatlar və sülhsevər dövlətlər tərəfindən kəskin şəkildə pislənilməli və Erməsintan təcavüzünə, işğal siyasətinə son qoymalıdır.

Beynəlxalq Dialoq və İnkişaf Alyansı olaraq, Ermənistan silahlı qüvvələrinin işğal olunmuş Azərbaycan torpaqlarından dərhal çıxarılmasını tələb edirik. Beynəlxalq təşkilatları və dünya birliyini Ermənistanın Azərbaycan ərazisində törətdiyi cinayətlərə lazımi hüquqi qiymət verməyə və beynəlxalq hüquq pozuntularının qarşısını almağa, Ermənistana qarşı ciddi sanksiyalar tətbiq etməyə və təcili tədbirlər görməyə çağırırıq".

PƏRİ
Versus.Az