MHP sədri vətəninin azadlığından yazdı

03:12 26-10-2020 | 1133 | Cəmiyyət

Əlisahib Hüseynov: "Qayıdışın mübarək, Qubadlım"

"Azadlıq günün mübarək olsun, doğma yurdum! Qayıdışın mübarək, Qubadlım!"

Versus.Az xəbər verir ki, bu sözləri MHP sədri, qazi Əlisahib Hüseynov Qubadlının işğaldan azad olunması ilə bağlı şəxsi "facebook" hesabında təəssüratlarını paylaşarkən deyib.

Əlisahib Hüseynovun sosial şəbəkədəki paylaşımını təqdim edirik:

"Mən hazırda heç bir sözlə ifadə olunmayan çox möhtəşəm və qeyri-adi hisslər yaşayıram! Qürur və sevinc hissim hədsizdir! Çünki vaxtilə həm doğulduğum, həm də uğrunda döyüşdüyüm Qubadlı 27 illik işğaldan sonra yenidən böyük Azərbaycan ailəsinə geri döndü.

Bu sevincli anları yaşamağımız üçün öz canlarını fəda etmiş əziz şəhidlərimizin ruhları qarşısında baş əyirəm. Eləcə də Milli Qəhrəmanlarımız Əliyar Əliyev və Şükür Həmidovun ruhlarına Allahdan rəhmət diləyirəm. Bu qürür dolu xoş anlarımıza görə sizlərə borcluyuq!

Şanlı və rəşadətli Ordumuza, bütün əsgər və zabitlərimizə ürəkdən "eşq olsun!" deyirəm və sizi böyüdən anaların əllərindən öpürəm!

Cənab Prezident, Ali Baş Komandan, bu möhtəşəm "tvit"inizi böyük bir səbirsizliklə gözləyirdik. Var olun! Sizinlə fəxr edirik! Siz yurd yerlərimizin azadlığı yolunda əzmlə mübarizə aparan fədakar Ali Baş Komandan kimi ən gözəl sözlərə layiqsiniz.

Bütün qubadlılarımızı təbrik edirəm. Gözünüz aydın olsun, əziz həmyerlilərim!

Və nəhayət, uzun illər boyu Qubadlıdan uzaqda ayrılıq həsrəti ilə yaşayıb dünyalarını dəyişən atamı, anamı xəyali olaraq təbrik edirəm. Ruhlarınız şad olsun.

Xoş gördük, Qubadlım".

Versus.Az