O, beynəlxalq münasibətlər və Türk Cümhuriyyətləri ilə iş üzrə sədr müavini olacaq
Ordumuzun möhtəşəm qələbəsi və Ali Baş Komandanın xalqı az qala hər həftə maraqlı xəbərlərlə ruhlandırmasından sonra cəmiyyətdə hədsiz nikbin ovqat hökm sürür.
Təbii ki, 44 günlük müharibə dövründə bütün ölkə Vətən savaşına köklənmişdi və ölkənin bütün siyasi təşkilatları da ordumuza, onun sərkərdəsinə birmənalı dəstək ifadə edirdilər. Bu baxımdan son 2 ayda ölkənin siyasi səhnəsində bir durğunluq hökm sürürüdü. Amma bu sakitliyi Müasir Müsavat Partiyası pozdu.
Versus.Az Moderator.az-a istinadən xəbər verir ki, sabiq millət vəkili Gülər Əhmədova bu günlərdə adıçəkilən partiyaya üzvlüyə qəbul olunub.
Məlumata görə, tezliklə təşkilatın keçirilməsi nəzərdə tutulan qurultayda G.Əhmədova partiya sədrinin müavini postuna gətiriləcək. Onun beynəlxalq münasibətlər və Türk Cümhuriyyətləri ilə iş üzrə məsələləri kurasiya edəcəyi bildirilir.
Yayılan xəbəri dəqiqləşdirmək üçün Gülər Əhmədova və Hafiz Hacıyevin məsələyə münasibətini öyrəndik. Hər ikisi siyasətçi xəbəri təsdiqləyiblər.
PƏRİ
Versus.Az