Millimizin daha iki aparıcı üzvü ilin ilk yarışına gedə bilməyəcək

Cüdo üzrə 2021-ci ilin ilk yarışı olacaq Masters turnirində Azərbaycan millisinin daha iki aparıcı üzvü iştirak edə bilməyəcək.

Bunlar son Avropa çempionatının mükafatçısı Məmmədəli Mehdiyev (-90 kq) və dünya çempionatının medalçısı gürcüstanlı legionerimiz Uşanqi Kokauridir (+100 kq).

Azərbaycan Cüdo Federasiyasının baş katibinin müavini Elnur Əşrəfoğlunun məlumatına görə, hər iki idmançının zədəsi olduğundan, son anda onların adları turnirin iştirakçılar siyahısından çıxarılıb.

Xatırladaq ki, daha əvvəl aparıcı üzvlərimizdən Rüstəm Orucov (-73 kq) və Hidayət Heydərovun (-81 kq) bu yarışa gedə bilməyəcəyi müəyyən olunmuşdu.

Qeyd edək ki, Olimpiadaya lisenziya xalları qazandıran Masters turniri Qətərin paytaxtı Dohada keçiriləcək.

11-13 yanvar tarixlərində baş tutacaq yarışda dörd kişi və üç qadın idmançımız mübarizə aparacaq.