“Yanlış, ya düz, hakimiyyət bizi yaman yerdə “yaxalayıb””

“Seçkinin önə çəkilməsinin səbəbləri çox ola bilər. Yanlış, ya düz, hakimiyyət bizi yaman yerdə “yaxalayıb””.

Bunu Versus.Az-a Vətəndaş və İnkişaf Partiyasının (VİP) sədri Əli Əliyev növbədənkənar prezident seçkisinin 2018-ci il aprelin 11-nə təyin olunması ilə bağlı səbəbləri açıqlayarkən bildirib. Seçkinin növbədənkənar keçiriləcəyi ilə bağlı ilkin ehtimalları hələ 2 ay əvvəldən açıqladığını deyən partiya sədri hesab edir ki, seçkilərin vaxtının önə çəkilməsinə ən ciddi səbəb hakimiyyətin daxilində baş verən çox gərgin hadisələrdir:

“Bir qrup hakimiyyət mənsubları hesab edirlər ki, onların xidmətləri müstəsnadır, hakimiyyətin zəmini onlardır, toxunulmaz və dəyişilməzdilər. Təbii ki, bu sözgəlişi söylənmir və düşünülmür. Həmin qrupun nəzarətində olan konkret daxili idarəçilik mexanizmləri, beynəlxalq dəstək, maliyyə resursları və fiziki güc mövcuddur. Bu qrupa qarşı gözlənilməzlik amilindən istifadə olunduğunu düşünürəm. Bu qrupun söykəndiyi beynəlxalq mərkəzin özünün də bu dövrdə başı seçkiyə qarışmış olacaq”.

Ə.Əliyev digər faktor kimi beynəlxalq amilin üzərində dayanıb:

“Hər dəfə planlaşdırılan seçki kampaniyasına geniş müdaxilələr olduğundan, belə bir seçkilər müşküllərin sayını azalda bilər. Həm də əsas mənfi təsir rıçaqı rolunda çıxış edən Rusiyanın özünün başı seçkilərə qarışmış olacaq”.

Ə.Əliyev deyib ki, üçüncü uduş amili hakimiyyət üçün müxalifətin qəfil haqlanmasıdır:

“Adətən müxalifətimiz “dinozavr” kimi yöndəmsiz hərəkət etdiyindən, konsolidasiyanı yaz mövsümünə saxlayırdılar. Bu addım həm də müxalifəti pərakəndə vəziyyətdə saxladı”.

VİP sədri seçkinin növbədənkənar kemirilməsində başqa bir amilin potensial namizədlərlə bağlı olduğunu qeyd edib:

“Onların seçki hazırlıqları plana uyğun yaz-yay mövsümünə təsadüf etdiyindən əksəriyyət hələ seçki ovqatında deyil.O səbəbdən vaxtın irəli çəkilməsi təbii şəkildə bəzilərini çıxdaş edəcək.

Bir məsələ də hakimiyyət üçün “baş ağrısı” olan siyasi məhbus məsələsidir. Novruza böyük bağışlanma aksiyası ola bilər. Seçki təqvimi elə tərtib edilib ki, həmin şəxslərdən iddialılar seçkidən kənarda qalacaq. Bu amillər ilk ağıla gələnlərdir”.

Ləman
Versus.Az