Millimiz mundialın seçmə mərhələsində ikinci oyununa çıxacaq

Futbol üzrə Azərbaycan millisi bu gün 2022-ci ildə Qətərdə keçiriləcək mundialın seçmə mərhələsində ikinci oyununa çıxacaq.

Versus.Az xəbər verir ki, Canni De Byazinin başçılıq etdiyi millimiz A qrupunda lider Serbiya yığmasını qəbul edəcək. Bu, millimizin cari tsikldə ilk ev matçı olacaq.

İndiyədək Azərbaycan və Serbiya yığmaları beş dəfə qarşılaşıb. Bunlardan dördü rəsmi, biri isə yoldaşlıq oyununa təsadüf edib. Oyunlardan birində Azərbaycan, üçündə Serbiya qalib gəlibsə, daha bir oyunda heç-heçə qeydə alınıb. Qələbə və heç-heçə Serbiyanın Monteneqro ilə birgə olduğu Serbiya-Çernoqoriya dövrünə təsadüf edib. Baş tutan qarşılaşmalarda topların nisbəti serblərin xeyrinədir – 14:6.

Yığmanın heyətində müdafiəçi Bəhlul Mustafazadə zədəlidir. “Sabah”ın futbolçusunun oynayıb-oynamayacağı sual altındadır. Serblər isə Bakıya üç itki ilə gəlib. “Verder”in müdafiəçisi Miloş Velkoviç və “Rubin”in hücumçusu Corce Despotoviç zədə, “Fiorentina”nın arxa xətt oyunçusu Nikola Milenkoviç isə cəza səbəbindən meydana çıxa bilməyəcək.

Bakı Olimpiya Stadionunda keçiriləcək görüş pandemiya səbəbindən azarkeşsiz baş tutacaq.

DÇ-2022-nin seçmə mərhələsi

III tur

A qrupu

20:00 Azərbaycan - Serbiya

Hakimlər: Roy Raynşrayber, David Elias Biton, Saci Metzamber, David Fuksman (hamısı İsrail)

Bakı Olimpiya Stadionu

Turnir cədvəli 

1. Serbiya – 4

2. Portuqaliya – 4

3. Lüksemburq – 3

4. Azərbaycan – 0

5. İrlandiya – 0

Qeyd edək ki, bu qrupun digər matçında Lüksemburq Portuqaliyanı qəbul edəcək. DÇ-2022-nin meydan sahibi Qətər millisi isə Macarıstanın Debretsen şəhərində qrupun autsayderi İrlandiya ilə yoldaşlıq oyunu keçirəcək.