İsraildən Azərbaycana növbəti dəstək

Azərbaycanda olan israilli həkimlərdən ibarət nümayəndə heyəti İkinci Qarabağ müharibəsində yaralanmış hərbçilərə dəstək göstərməyə davam edəcək.

Versus.Az xəbər verir ki, bunu nümayəndə heyətinin rəhbəri, cərrah-oftalmoloq İşay Falik deyib.

Onun sözlərinə görə, hazırda bir çox xəstənin yalnız müşahidəyə ehtiyacı var, bəziləri üçün isə yeni protezlər lazımdır:

“Bu dəfə biz özümüzlə 24 yeni protez gətirmişik və Azərbaycana bəzi tibbi avadanlıqları təhvil vermişik. Çünki biz dövlətin hərbi qulluqçuların sağlamlıq vəziyyətinin yaxşılaşması üzrə səylərini dəstəkləyirik”.

O bildirib ki, Azərbaycana ilk səfəri zamanı 150-yə yaxın hərbçinin müalicəsi ilə məşğul olub:

“Əvvəl biz fikirləşirdik ki, 100 nəfəri müalicə edəcəyik, amma sonra məlum oldu ki, təxminən 150 nəfər olacaq. Onların əksəriyyətinin xüsusi oftalmoloji prosedurlara, protezlərin sabitləşməsi üçün göz plastikasına, bəzilərinin isə gözün buynuzlu qişasının transplantasiyasına ehtiyacı var idi”.

Həkim Azərbaycanda işlədiyi zaman ən yaddaqalan təcrübəsi barədə də danışıb. O, müharibədən əvvəl dizayner peşəsi üzrə təhsil alan bir xəstəni müalicə edirdi. Cəbhədə bomba partlayışı nəticəsində hərbçi görmə qabiliyyətini demək olar ki, tam itirir və işıqdan başqa heç nə görə bilmir. Əsgərin gözünün tor qişası aralandığı üçün əməliyyat keçirilib və bunun sayəsində o, yenidən görməyə başladı.

Cərrahın sözlərinə görə, o, hərbçilərin müalicəsi üçün zəruri tibbi avadanlığın Azərbaycana tədarük olunmasına kömək göstərməyə çalışır.

İ.Falik bu dəfə Azərbaycana onkoloq olan həyat yoldaşı ilə birlikdə gəlib. Onların məqsədi ölkələr arasında zərurət olan sahələr üzrə təmasları təmin etməkdir.

Onun sözlərinə görə, bu, Azərbaycana ikinci səfəridir. Növbəti dəfə onun bu ilin mayında xəstələrin müayinəsini davam etdirmək üçün gəlməsi planlaşdırılır. /trend/

Versus.Az