Qazi adı altında reketlik edən şəxs saxlanıldı

Xəzər rayonunda dələduzluq edən makler Azər Cəbrayılov həbs edilib. 

Versus.Az xəbər verir ki, bu barədə hüquq-mühafizə orqanlarından məlumat verilib.

Onun barəsində mülkiyyət, istifadə və ya icarə hüququ olmadan neft sənayesinə aid torpaq sahələrində özbaşına tikinti işləri apardığına görə cinayət işi başladılıb. 

Qeyd edək ki, Azər Cəbrayılovun qanunsuz əməlləri barədə mətbuatda da geniş araşdırmalara yer verilib. 

O, Maştağa və Buzovnada SOCAR-a məxsus torpaqları zəbt edib, tikinti işləri aparması ilə gündəmə gəlib. Azər Cəbrayılov neft quyularının yaxınlığında qanunsuz tikdiyi evləri daha sonra müxtəlif şəxslərə satıb.

Sakinlərin dediyinə görə, Azər Cəbrayılovla SOCAR əməkdaşları arasında bir neçə dəfə qarşıdurma da yaranıb. O, ətrafına topladığı şəxslərlə H.Z.Tağıyev adına Neft-Qaz Çıxarma İdarəsinin əməkdaşlarına və mühafizəçilərə hücum çəkərək tikinti işlərinin qarşısının alınması üçün görülən tədbirlərə mane olub.

Azər Cəbrayılov qanunsuz tikinti işlərini başa çatdırmaq üçün özünü “Qarabağ qazisi” adlandıran saxtakar qruplaşma ilə də əlaqəyə girib. O, pul müqabilində həmin şəxslərdən tikintiyə müdaxilə olunmasının qarşısını almağı təklif edib.

Sakinlərin bildirdiyinə görə, Azər Cəbrayılov neft quyularının yaxınlığında tikdiyi evləri satmaq üçün bir çox ailələrə yalan vədlər verib: məsələn yaxınlıqdakı neft quyusu işləmir, yaxud bir neçə ay sonra həmin neft quyusu söküləcək, bu ərazilər abadlaşdırılacaq və sair. Təbii ki, bunların heç biri gerçəkləşməyib və hazırda bir çox ailə neft quyularının ətrafında təhlükəli, normal yaşayış üçün heç bir şəraiti olmayan, üfunət qoxulu ərazilərdə yaşamağa məcbur qalıb. 

Qeyd edək ki, Azər Cəbrayılovun zəbt edib tikinti işləri apardığı mədən ərazilərində yeni neft quyularının qazılması planlaşdırılsa da, həmin ərazilərdə kütləvi məskunlaşma olduğundan bu işləri icra etmək mümkün deyil.