"Ordan bura, burdan da ora xəbər aparırlar, ortada da heç nə yox"

"Millət vəkili Zahid Orucun parlamentdə səsləndirdiyi təklifi dəstəkləyirəm".

Versus.Az xəbər verir ki, bunu açıqlamasında politoloq Elxan Şahinoğlu bildirib. Politoloq qeyd edib ki, ATƏT-in Minsk Qrupu və həmsədrlər 20 ildən çoxdur turistik səfərlərlə məşğuldurlar, polşalı Andjey Kaspçik ölkəsinin XİN sisteminə qayıtmır ki, ATƏT-in bölgədəki təmsilçisi kimi yaxşı maaş alır, bu illərdə əldə etdiyi gəlir hesabına bir neçə villa alıb:

"Yəni bizim faciəmiz üzərində varidatını artırır, heç bir iş də görmür, o birilər də elə. Ona görə də danışıqları vasitəçisiz, birbaşa qarşı tərəfin təmsilçiləri ilə davam etdirmək lazımdır. Əlbəttə, bu o demək deyil ki, nəticə olacaq. Ancaq heç olmazsa bilərik ki, bizim dərdimiz üzərində böyük dövlətlər manipulyasiya ilə məşğul deyillər. Danışıqları birbaşa işğalçı ilə aparmaq lazımdır ki, nəticə olmadıqda məsuliyyət onun üzərində qalsın. Yoxsa həmsədlər gedirlər İrəvana, oradan gəlirlər Xankındiyə və Bakıya, ordan bura, burdan da ora xəbər aparırlar, ortada da heç nə yox".

SEVDA
Versus.Az