ALDP-də təşkilatı məsələlər müzakirə olunub

ALDP-də 20 Yanvar faciəsinin növbəti ildönümünün yad edilməsi və təşkilatı məsələlər müzakirə olunub

Azərbaycan Liberal Demokrat Partiyasının (ALDP) sədri Fuad Əliyev bu gün Sədr Aparatının iclasını keçirib. Versus.Az-ın məlumatına görə, iclasda ictimai-siyasi vəziyyət, 20 Yanvar faciəsinin növbəti ildönümünün yad edilməsi və təşkilatı məsələlər müzakirə olunub.

Toplantıda 20 Yanvar şəhidlərinin xatirəsi bir dəqiqəlik sükütla yad edilib.
Fuad Əliyev faciələrimizin dünya dövlətlərinin ali qanunverici organları tərəfindən tanıdılmasının mürəkkəb olduğunu vurğulayaraq, təbliğat aparmaqla ən azından həmin cəmiyyətlərin şüurunda dəyişikliyə nail olunmasının mümkünlüyünü bildirib:

“Bu da bir həqiqətdir ki, faciələrimiz dünyanın ayrı-ayrı ölkələrində qeyd olunmaqla xalqımıza qarşı keçmiş SSRİ rəhbərliyinin, işğalçı Ermənistanın irtıcaçı mövqeyi ifşa olunur. Mənə elə gəlir ki, bu istigamətdə bütün gücümüz səfərbər olunmalıdır. Avropa ilə əməkdaşlıq edən yerli QHT-lər, diaspor təşkilatlarımz, imkanlı azərbaycanlılar Azərbaycan xalqının başına gətirilən faciələrimizin dünyada tanıdılmasında yaxından köməklik göstərməlidirlər”.

ALDP Azərbaycan Demokrat Partiyasının (ADP) 20 Yanvar hüzn günü “Şəhidlər günü” ilə əvəzlənməsi təklifini dəstəkləyərək bildirir ki, həmin gün 20 Yanvar şəhidləri timsalında Azərbaycanın ərazi bütövlüyü uğrunda canlarından keçən bütün şəhidlərimiz anılsın. Təhsil müəssisələrində şəhidlər və şəhidliklə bağlı maarifləndirmək işlərinə başlanılsın. Televiziyada və kütləvi informasiya vasitələrində milli-mənəvi dəyərlərin, şəhidliklə bağlı məsələlərin təbliğat və aşılanmaq işlərininin gücləndirilməsi kimi tədbirlər keçirilsin.

Daha sonra Sədr Aparatı, 20 Yanvar Şəhidlərinin Anım Gününün qeyd edilməsi ilə bağlı 20 Yanvar 2018-ci il saat 12:00-da Şəhidlər Xiyabanını ziyarət etmək haqqında qərar qəbul edib.

Nilufər
Versus.Az